नेपाली सेनाले प्रधानमन्त्री केपी शर्मा ओलीलाई काठमाडौं तराई फास्ट ट्रयाकको प्रगतिबारे जानकारी गराएको छ।
भारत भ्रमणबाट फर्किएको दुई दिनपछि प्रधानसेनापति राजेन्द्र क्षत्रीले प्रधानमन्त्री ओलीलाई जंगी अड्डामा निम्त्याएर फास्ट ट्रयाकबारे ब्रिफिङ गरेका हुन्। क्षत्री ६ दिन लामो भारत भ्रमण पूरा गरेर यही जेठ २८ गते राजधानी फर्किएका हुन्।
बारुद आपूर्तिका कारण फास्ट ट्रयाक निर्माणमा समस्या झेल्दै आएको नेपाली सेनाले पछिल्लो समय विकल्प खोजिरहेको छ। प्रधानसेनापति क्षत्रीको भारत भ्रमणसमेत बारुद आपूर्तिमा केन्द्रित रहेको समाचार सार्वजनिक भएका थिए। नेपाली सेनाका प्रवक्ता गोकुल भण्डारीले भने भारत भ्रमणका क्रममा भएका द्विपक्षीय कुराकानीबारे कुनै जानकारी नभएको बताए।
भारतीय सहयोगबिना फास्ट ट्रयाक अघि बढाउन नसकिने सेनाको बुझाइ छ। सेनाले फास्ट ट्रयाकमा चिनिँया सहायताको बाटो पनि हेरिरहेको छ। प्रधानमन्त्रीको भ्रमणलगत्तै प्रधानसेनापति क्षत्री चीन भ्रमणमा जाँदैछन्।
काठमाडौँलाइ बाराको निजगढसँग जोड्ने ७६ किमी लामो फास्ट ट्रयाक निर्माण पाँच वर्षमा सक्ने गरी सरकारले सेनालाई जिम्मा दिएको हो। सेनाले विभिन्न दस स्थानमा बेस स्थापना गरेर साइटको क्लियरिङ गरिरहेको छ। दायाँबायाँ रुख काट्ने काम पनि गरिरहेको छ।
सेनासँग हालसम्म सडकको डिपिआर छैन। राजधानीमा फास्ट ट्रयाकको प्रस्थान विन्दुबारे पनि सहमति जुट्न सकेको छैन।
सेनाले २०७० सालमा फास्ट ट्रयाकको १२० किलोमिटर ट्रयाक खोलेको थियो। पुष्पकमल दाहाल प्रधानमन्त्री भएका बेला यसको जिम्मा सेनालाई दिइएको हो।
