नेपाल कम्युनिष्ट पार्टीका सहअध्यक्ष पुष्पकमल दाहालले आफ्नो जीवन निरन्तरताको क्रमभंगता गदागर्दै अघि बढेको र कतिपय ठाउँमा कमजोरी भएको बताएका छन्।
नेकपा एमाले र माओवादी केन्द्रको एकता घोषणा गर्न राष्ट्रिय सभा गृहमा आयोजित कार्यक्रममा बोल्दै दाहालले फर्केर हेर्दा कतिपय ठाउँमा कमजोरी गरेको महशुस हुने बताए।
‘मैले कमजोरी गरेका बेला जनताले र देशले देशले दुःख पाएका छन्,’ दाहालले भने, ‘राम्राको काम गरेकाले जनताले सुख पाएका छन्, राष्ट्रलाई राम्रो भएको छ।'
उनले यसअघि सानातिना क्रमभंग भए पनि पार्टी एकता महान छलाङ र फड्को भएको बताए।
‘गुणात्मक छलाङ हो। हाइड्रोजन र अक्सिजन मिलेजस्तै हो। पानीभित्र यी दुई तत्व छुट्याउन सकिँदैन। यो नयाँ यौगिक बनिसकेको छ,’ दाहालले भने, ‘ यो यस्तो तागत बन्नेवाला छ। जनतालाई चाहिएको सुशासन दिनेछ।’
उनले आजबाट नेपालको इतिहासमा नयाँ युगको सुरू भएको बताए।
‘यसका बहुआयाम छन्। राष्ट्रको सम्वृद्धि, जनताको विकासको चाहना, आन्दोलनमा परिमार्जन गर्न, अन्तर्राष्ट्रिय राजनीतिमा विकास, स्थीरता र सुशासनको सन्देश दिन अर्थपूर्ण छ,’ उनले भने।