नेकपा माओवादी केन्द्रकी प्रवक्ता पम्फा भुषालले नयाँ सरकार गठनअघि नै एमाले र माओवादी केन्द्रबीच पार्टी एकता हुने विश्वास व्यक्त गरेकी छन्।
बिहीबार राजधानीमा आयोजित साक्षात्कार कार्यक्रममा प्रवक्ता भुषालले चाँडै पार्टी एकताले निश्कर्ष लिने बताएकी हुन्। उनले भनिन्,‘सरकार गठन अघि नै पार्टी एकता भैसक्छ, एकता संयोजन समितिले अहिले द्रुत गतिमा कामहरू गरिरहेको छ।’
उनले वैचारिक रूपमा खासै विवाद नभएको र सांगठानिक व्यवस्थापनमा पनि आवश्यक परे कार्यदल बनाएर अघि बढ्न सकिने जानकारी दिइन्।
साक्षात्कारमा बोल्दै उनले पार्टी एकतामा कुनै समस्या नभएकोले दुई अध्यक्षहरू बसेर सबै कुरा टुंगो लगाउने धारणा राखिन्। उनले भने,‘शीर्ष नेताद्वय केपी शर्मा ओली र पुष्पकमल दाहाल प्रचण्डजीको कार्यविभाजन उचित ढंगले हुन्छ, पार्टी एकता भएपछि अध्यक्ष पनि आफ्नो हुन्छ, अध्यक्ष पनि आफ्नो हुन्छ, यत्ति हो उहाँहरुको सम्मानजनक ढंगले कार्यविभाजन हुन्छ।’
तल्लो लेभलमा कार्यकर्ताहरूबीच एकता भैसकेकोले अब केन्द्रमा पनि एकता चाँडै हुनेमा कुनै द्विविधा नभएको भुषालको भनाइ थियो। उनले भने,‘अब माथिल्लो लेभलमा दुई जना अध्यक्षबीच कुरा मिल्न बाँकी छ, छिट्टै मिल्छ, तल्लो लेभलमा त निर्वाचनमै सबै एक भएको कुरा स्पष्ट छ।’
सरकारले हिजो अस्थायी राजधानी र प्रदेश प्रमुख तोकेको निर्णयप्रति टिप्पणी गर्दै उनले उक्त निर्णयमा आफूहरूको कुनै सहमति नभएको जिकिर गरिन् । उनले भनिन्,‘सरकारले हिजो गरेको निर्णय राजनीतिक सहमतिबाट गरेको होइन्, तर यो निर्णयले नयाँ सरकार गठनको लागि मार्गप्रशस्त गरेको छ।’
भुषालले प्रदेशको अस्थायी राजधानी अहिले तोकिएपनि प्रदेशहरूले आफू अनुकुल नयाँ स्थायी राजधानी तोक्ने पनि स्पष्ट पारिन्। त्यस्तै, उनले प्रदेश प्रमुखबारे पनि नयाँ सरकारले नयाँ धारणा बनाउन सक्ने बताइन् ।
उनले वाम गठबन्धनभन्दा बाहिर गएर सरकार नबन्ने समेत जिकिर गरिन् । उनले भनिन्,‘वाम गठबन्धनभन्दा बाहिर गएर सरकार बन्दैन, गठबन्धनभित्रैको सरकार बन्छ।’
भुषालले व्यवसायी अजेयराज सुमार्गीको आफ्नो पार्टीका अध्यक्ष पुष्पकमल दाहाल प्रचण्डसँग कुनै विशेष सम्बन्ध नभएको स्पष्ट पारिन् । उनले भनिन्,‘हामीले जानेको के हो भने सुमार्गी व्यवसायी हो, त्यो भन्दा बेसी यो देशका नागरिकसँग राजनीतिक पार्टीहरुको अथवा हाम्रो पार्टीको जे सम्बन्ध हुन्छ, त्यति छ, त्यो भन्दा बढि सुमार्गीसँग विशेष सम्बन्ध छैन।’
उनले प्रचण्डको सरंक्षणमा सुमार्गी रहेको भन्ने आरोपको खण्डन गर्दै भनिन्,‘यो विल्कुलै भ्रमपूर्ण प्रचार हो, दुई मिडिया हाउस, दुई व्यवसायिक मान्छेहरूकाबीचको बहस अहिले बजारमा छ, मैले पनि तपाईहरूका मिडियामार्फत आएका समाचारहरू पढ्छु, दुई जना व्यवसायीहरूको लेनदेनको या प्रतिष्पर्धाको (स्वस्थ या अस्वस्थ) सम्बन्ध रहेर हाम्रो पार्टीको अध्यक्षसँग जोड्नु कुनै सान्दर्भिक पनि छैन, र, अहिले चलेको बहसमा हाम्रो पार्टी र नेतृत्वको कुनै भूमिका छैन।’
सुमार्गीलाई त तपाईको पार्टीको सरंक्षण छ अरे नि त ? भन्ने प्रश्नमा भुषालले खण्डन गर्दै भनिन्,‘दुई व्यवसायिक घराना, दुई व्यवसायिक व्यक्तित्व, अथवा दुवै मिडिया होल्डरहरूसँगको बहस तपाईले कहाँ सुन्नुभएको छ ? कसको बारेमा सुन्नुभएको छ ? कसको संरक्षणमा चलेको भनेर कहाँ सुन्नुभएको छ ? विल्कुल उहाँहरूको चलेको छ।’ उनले दुई घरानावीच स्वस्थ सम्बन्ध बनाउन समेत सुझाव दिइन् ।
‘स्वस्थ ढंगले, मर्यादित ढंगले, देशको कानूनी ढंगले जसले जसलाई पालना गर्छ गर्नुहोस्, स्वस्थ सम्बन्ध बनाउनुहोस्, यत्ति कामना गर्छौं’–उनले भनिन् ।
सुमार्गीको धन अवैध हो भने राज्यले छानबिन गर्नुपर्ने बताउँदै उनले भनिन्,‘अवैध धन हो भने राज्य छ नि त, छानबिन गरेर त्यसको निर्क्यौल गर्नुपर्छ, अहिले त हाम्रो पार्टी सरकारमा छैन, सम्पत्ति शुद्धीकरण अरु लिगल के–के छ ? त्यो पाटो त राज्य छ नि त, राज्यका संरचनाहरू छन्, उनीहरूले सत्यतथ्य बाहिर ल्याए हुन्छ, अहिले मिडियाले मात्रै ल्याएको छ, अब राज्यले बाहिर ल्याओस्, यतिमात्रै हो।’
