पाँचथरमा हिलिहाङ गाँउपालिकाको केन्द्र सार्न मतदान, कार्यपालिकाको प्रस्ताव गाँउसभाद्वारा अस्वीकृत


 

पाँचथरको हिलिहाङ गाँउपालिकाको केन्द्र परिवर्तन गर्ने विषयमा गाँउ सभामा मतदान भएको छ । मंगलबार बसेको हिलिहाङ गाँउपालिकाको दोस्रो गाँउसभामा गाँउ कार्यपालिकाको केन्द्र परिवर्तन गर्ने प्रस्ताव गाँउ सभाको बहुमतले अस्विकृत भएको छ ।

हिलिहाङ गाँउपालिकाको केन्द्र साविक पञ्चमी गाविसको कार्यालय (हाल हिलिहाङ–४)मा रहेको छ । उक्त केन्द्र सबै गाँउपालिकाबासीका लागि पायक नभएको भन्दै गाँउ कार्यपालिकाले हिलिहाङ–३ गोपेटारमा सार्ने प्रस्ताव गाँउसभामा गरेको थियो ।

छलफलबाट सहमति नजुटेपछि उक्त विषयको टुङ्गो गोप्य मतदानबाट गरिएको थियो । मतदानमा हालकै स्थान कायम गरिनुपर्छ भन्ने पक्षमा २० मत तथा गोपेटार सार्ने पक्षमा १७ मत खसेको गाँउपालिकाका सूचना अधिकारी देवेन्द्र कटुवालले जानकारी दिए ।

गाँउसभाका ३९ सदस्यमध्येका एक सदस्य विष्णुप्रसाद सापकोटा जिल्ला समन्वय समितिका सभापति चयन भएको तथा अध्यक्ष भूवानीप्रसाद लिङ्देनले निर्णायक मतदान मात्रै गर्न पाउने भएका कारण ३७ जना गाँउसभा सदस्यले मात्रै मतदानमा सहभागी भएका थिए।

स्थानीय तह पुनर्संरचनाका क्रममा दलहरु तथा जिल्लास्थित प्राविधिक सहयोग समितिले उक्त गाँउपालिकाको केन्द्र गोपेटार नै रहने समझदारी निर्माण गरेका थिए । तर, संघीय मामिला तथा स्थानीय विकास मन्त्रालयले स्थानीय तहको केन्द्र निर्धारण गर्न बनाएको कार्यदलले जुन गाविसमा केन्द्र तोकिएको छ, सोही गाविसको कार्यालयबाट तत्काललाई सेवा प्रवाह गर्न निक्र्यौल गरेको थियो ।

जसका कारण पञ्चमी गाविसको कार्यालयबाट सेवा प्रवाह हुँदै आएको थियो । स्थानीय तह सञ्चालन कार्यविधिले जनप्रतिनिधि निर्वाचित भएको ६ महिना ( आगामी पुष १४ गते) भित्र गाँउ सभाको सामान्य बहुमतले केन्द्र परिवर्तनको सिफारिस गर्न सक्ने अधिकार दिएको छ ।

गत मंसिर २९ गते बसेको हिलिहाङ गाँउ कार्यपालिकाको बैठकले केन्द्र परिवर्तन गर्ने निर्णय गर्दै गाँउ सभा आव्हान गरिएको थियो । हाल कायम रहेको केन्द्र नै उपयुक्त हुने पक्षमा हिलिहाङका ४ ओटा वडा (१,२,४ र ५) का जनप्रतिनिधि उभिएपछि कार्यपालिकाको निर्णय पारित हुन नसकेको हो ।

वडा नं. ३, ६ र ७ का जनप्रतिनिधि भने गोपेटार केन्द्र रहनुपर्छ भन्ने पक्षमा रहेको वुझिएको छ । यद्यपी आगामी दिन पनि गाँउ सभाको दुई तिहाई बहुमतले केन्द्र परिवर्तनको निर्णय लिन सक्छ ।

हिलिहाङका ३८ मध्ये ३ वडा सदस्य नेपाली काँग्रेसबाट निर्वाचित भएका छन् भने बाँकी सबै नेकपा (एमाले)बाट निर्वाचित भएका छन् । गाँउ सभाले वडा नं. १ र वडा नं. ३ को केन्द्र परिवर्तन गर्ने निर्णय भने सर्वसहमत रुपमा गरेको सूचना अधिकारी कटुवालले वताए ।

हाल गाँउपालिकाको केन्द्रमा भवन बाहेक अन्य पूर्वाधार छैनन् । केन्द्रसम्म नियमित सवारी सञ्चालन नहुँदा सेवाग्राहीले मार खेप्नु परिरहेको छ । गाँउ कार्यपालिकाले मेची राजमार्ग आसपासमा कार्यालय स्थापना गर्नेगरि गाँउसभामा प्रस्ताव लगेको थियो ।

तर, ४ वडाका जनप्रतिनिधिहरु हालकै केन्द्र गाँउपालिकाको विच भागमा रहेको भन्दै गाँउपालिकाको केन्द्रमा आवश्यक पूर्वाधार विकास गर्नुपर्ने पक्षमा उभिएका छन् ।

हिलिहाङका अधिकांश जनप्रतिनिधिहरुको केन्द्र निर्धारणका विषयमा उनीहरुवीच सहमति जुट्न सकेन् । अझ गाँउ कार्यपालिकाको बैठकबाट केन्द्र परिवर्तन गर्ने निर्णय गराएका जनप्रतिनिधिहरुले गोप्य मतदान गर्नुपर्ने व्यवस्था गराई पुरानै केन्द्रका पक्षमा मतदान गरेका छन् ।

Share:

© 2017 Setopati Sanchar Pvt. Ltd.