धनकुटालाई प्रादेशिक राजधानी बनाउन माग


धनकुटालाई प्रादेशिक राजधानी बनाउन माग गर्दै काठमाडौंमा दवाव अभियान सुरू गरिएको छ। धनकुटा प्रादेशिक राजधानी घोषणा दबाब समूहले मंगलबार काठमाडौंको माईतघर मण्डलामा एक कार्यक्रम आयोजना गरी धनकुटालाई प्रदेश नम्बर १ को राजधानी बनाउन दवाव अभियान सुरू गरेको हो।

हिमाल, पहाड र तराईलाई मिलाएर मुलुकलाई समृद्ध बनाउने संविधान र जनताको भावना अनुसार पनि धनकुटालाई प्रदेश नम्बर १ को राजधानी बनाउन उपयुक्त हुने अभियानमा संलग्न राष्ट्रिय प्रजातन्त्र पार्टी प्रजातान्त्रिक नेता एवम धनकुटाका पूर्व सांसद सुनिलबहादुर थापाले बताए।

उनले धनकुटालाई प्रादेशिक राजधानी बनाउन पर्याप्त पूर्वाधार रहेको दाबी समेत गरे। अभियानले ५ विकास क्षेत्रका अन्य सदरमुकामहरुलाई राजधानी बनाउने प्रस्ताव आईरहेका बेला धनकुटालाई चाँही नबनाउने कुरा न्यायिक नहुने तर्क समेत गरेको छ।

प्रदेश नम्बर १ को राजधानी विराटनगरलाई बनाउने प्रस्ताव गरिएको छ । तर धनकुटाबासीहरुले भने संविधान अनुसार पनि पहाडी जिल्लालाई पनि प्रादेशिक राजधानी बनाएर हिमाल, पहाड र तराईको संयुक्त प्रयासबाटै मुलुकलाई समृद्ध बनाउने सन्देश दिनुपर्नेमा जोड दिएका छन्।

Share:

© 2017 Setopati Sanchar Pvt. Ltd.