प्रदेश र प्रतिनिधि सभामा २५ लाखभन्दा बढी मत बदर

सेतोपाटी संवाददाता

काठमाडौं, पुस ३

प्रतिनिधि सभा र प्रदेश सभा निर्वाचनमा लाखौँ मत बदर भएको छ।

निर्वाचन आयोगले प्रतिनिधि सभा र प्रदेश सभाको निर्वाचनमा १ करोड ५ लाख ८७ हजार ५ सय २१ जनाले मत खसालेको विवरण सार्वजनिक गरेको थियो। तर, आयोगले समानुपातिकतर्फ ९५ लाख ४४ हजार ७ सय ४४ मत मात्र सदर भएको जनाएको छ। अर्थात् १० लाखभन्दा धेरै मत प्रतिनिधि सभाको समानुपातिकतर्फ बदर भएको हो।

आयोगको वेबसाइटमा उपलब्ध तथ्यांकलाई आधार मान्दा प्रतिनिधि सभाको समानुपातिकतर्फ १० लाख ४२ हजार ७ सय ७७ मत बदर भएको देखिएको छ। अर्थात् कूल मतदानको ९ दशमवल ८४ प्रतिशत मत बदर भएको हो। आयोगको तथ्याङ्क हेर्ने हो भने प्रदेश सभा तर्फ प्रतिनिधि सभामा भन्दा बढी मत भदर भएको छ। सात वटै प्रदेशमा गरि ९० लाख १९ हजार ४ सय ३० मत मात्र सदर भएको हो।

अर्थात् कुल मतदानको १४ दशमवल ८१ प्रतिशत मत बदर भएको तथ्यांकमा देखिन्छ। निर्वाचन आयोगका प्रवक्ता नवराज ढकालले मत बदरको हिसाबमा गडबढ रहेको बताए। ‘पाँच प्रतिशत भन्दा धेरै बदर हुँदैन, अन्तिम नतिजा नआई केही भन्न सक्ने अवस्था छैन’, ढकालले सेतोपाटीसँग भने, ‘समानुपातिकतर्फ प्रतिनिधि सभा र प्रदेश सभा एउटै मतपत्र छ। यस्तोमा दोहोर्‍याएर हिसाब भएको हुनसक्छ।’

निर्वाचन आयोगले पटक /पटकको निर्वाचनमा करोडौँ रकम मतदाता शिक्षामा खर्च गर्ने गरेको छ। मतदाता शिक्षाका लागि स्वयमसेवक परिचालनदेखि आयोगले मिडियामा मतदान सिकाउँदै विज्ञापन गर्ने गरेको छ। तर, मत बदरको प्रारम्भिक तथ्याङ्कले मतदाता शिक्षाको प्रभावकारितामा प्रश्न खडा भएको छ।

तथ्यांकमा प्रतिनिधि सभा र प्रदेश सभा निर्वाचन

मंसिर १० गते खसेको मत :

२० लाख ७२ हजार ६ सय ५७

मंसिर २१ गते खसेको मत :

८५ लाख १४ हजार ८ सय ६४

कुल मतदान :

१ करोड ५ लाख ८७ हजार ५ सय २१

प्रतिनिधि सभा तर्फ सदर मत :

९५ लाख ४४ हजार ७ सय ४४ मत

प्रदेश सभामा सदर मत

प्रदेश १ :

१७ लाख ३६ हजार ६ सय २२