प्रदेश ३ मा एमालेको एकल बहुमत, विवेकशीललाई ३ सिट


प्रतिनिधि सभा र प्रदेश सभाको प्रत्यक्षको नतिजापछि हालै समानुपातिक तर्फ पनि प्रदेश नम्बर ३ को मतपरिणाम आएको छ। आयोगले दिएको जानकारी अनुसार मतपरिणाममा प्रदेश ३ बाट समानुपातिकमा एमालेले सबैभन्दा बढी मत ल्याएर पहिलो पार्टी बनेको छ। एमालेले प्रत्यक्ष र समानुपातिक गरी प्रदेश ३ मा एकल बहुमतसमेत प्राप्त गरेको छ।

अन्तिम मतपरिणाम अनुसार एमालेले ६ लाख ६५ हजार २४९, कांग्रेस ५ लाख ४९ हजार ५०४, माओवादीले ३ लाख १२ हजार ९७, विवेकशील साझाले १ लाख १७ हजार १३९, राप्रपाले ५८ हजार १६३ र अन्य दलले १ लाख ५० हजार ९१४ मत पाएका छन्।

मत विभाजक सूत्र अनुसार प्रदेश सभाका लागि तोकिएको १.५ प्रतिशत थ्रेसहोल्ड कटाउने दलमध्ये एमालेले सबैभन्दा बढी १६ सिट पाउनेछ। यस्तै, कांग्रेसले १४, माओवादी केन्द्र ८, विवेकशील साझाले ३, राप्रपा प्रजातान्त्रिकले १, राप्रपाले १ र नेपाल मजदुर किसान पार्टीले १ सिट पाउने भएका छन्।

यसअघिनै प्रत्यक्षतर्फ एमालेले ४२, कांग्रेसले ७ र माओवादीले १५ तथा नेमकिपा र नयाँ शक्तिले समान १-१ सिट जितेको छ।

प्रदेश ३ मा सरकार बनाउन आवश्यक पर्ने ५६ सिट एमाले एक्लैले पुरा गरेको छ। प्रत्यक्ष र समानुपातिक गरी एमालेलाई ५८ सिट प्राप्त भएको छ।

 

 

Share:

© 2017 Setopati Sanchar Pvt. Ltd.