गोरखा २ मा मतगणना सुरू भएको छ।
पहिलो चरणको चुनाव भएकोमध्ये सर्वाधिक चासोपूर्वक हेरिएको गोरखाको मतगणना सुरु भएको छ। चुनावी प्रतिस्पर्धा र त्यसको नतिजा सबैक्षेत्रको उत्तिकै चासो विषय हुने भए पनि गोरखाको क्षेत्र नम्वर २ लाई भने पहिलो चरणमा चुनाव भएकामध्ये देशविदेशमा चासोपूर्वक हेरिएको छ ।
वाम गठवन्धनमा जोडिन पुगेर पनि त्यहाँबाट अलग्गिएर कांग्रेसको समर्थनमा उम्मेदवार बनेका डाक्टर बाबुराम भट्टराई र वाम गठवन्धनबाट उम्मेदवार बनेका माओवादी केन्द्रका वरिष्ठ नेता नारायणकाजी श्रेष्ठविच चुनावी प्रतिस्पर्धा भएकाले गोरखा क्षेत्र नम्वर २ बाट प्रतिनिधिसभामा यी दुईमध्ये को चुनिएलान् भन्ने चासो र चिन्ता सबैतिर छ ।
पहिलो चरणमा निर्वाचन भएको गोरखा जिल्लामा बिहीबार साँझ ५ बजेदेखि मतगणना सुरु भएको छ। जिल्ला समन्वय समितिको सभाहलमा भएको मतगणनामा सुरुमा पालुङटार, अजिरकोट, सिरानचोक र सुलीकोट गाउँपालिकाको मत एकै ठाउँमा मिसाएर गणना सुरु गरिएको छ।
दुई ठाउँमा तीन/ तीन हजार मत गणना गर्न सुरु गरिएको छ। यस क्षेत्रमा वाम गठबन्धनबाट नेकपा माओवादी केन्द्रका नेता नारायणकाजी श्रेष्ठ र नयाँ शक्ति पार्टी नेपालका संयोजक डा. बाबुराम भट्टराई प्रतिस्पर्धामा छन्। मुख्य निर्वाचन अधिकृतको कार्यालयले हरेक १/१ घण्टामा मतपरिणाम सार्वजनिक गर्ने तयारी गरेको छ। त्यस्तै क्षेत्र नम्बर १ को मतगणना महिला तथा बालबालिका कार्यालयमा हुँदैछ। क्षेत्र नम्बर १ मा वाम गठबन्धनबाट हरि अधिकारी र नेपाली कांग्रेसबाट चीनकाजी श्रेष्ठ प्रतिस्पर्धामा छन्।
