नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाको निर्वाचन सार्ने प्रयासहरु असफल भएको बताएका छन्। ओलीले भक्तपुरमा मतदान गरेपछि निर्वाचन सार्न धेरै कसरत भएको दावी समेत गरे।
प्रधानमन्त्री शेरबहादुर देउवाले बिहान मतदानपछि ‘ओलीले भोट हालेपछि पनि निर्वाचन सर्छ भन्नेछन्’ भन्दै व्यङ्ग गरेका थिए। पत्रकारहरुले मतदान पछि ओलीलाई देउवाको व्यङ्ग माथि प्रतिक्रिया माग गरेका थिए।
‘उहाँका प्रयासहरु असफल भए। कहिले सहयात्रीलाइ अदालत धाउन लाउने देखि धेरै कुरा भए’, ओलीले भने, ‘मतदान भैरहेको सन्दर्भमा धेरै कुरा भन्न चाहान्न।‘
यद्यपी ओलीले पटक पटक स्थानीय तहको निर्वाचन सारिनु, मतपत्र छाप्न नभ्याउने समस्या खडा गरेर अदालतमा लैजानुबाट देउवाको निर्वाचन सार्ने मनसाय रहेको ब्याख्या गरे।
उनले निर्वाचनको ठिक अघि भएको बम काण्डहरु समेत सरकारले रचेको आशंका व्यक्त गरे।
‘छेउछाउमा बम काण्ड भए र केही रचना भए होलान्। सयौँ बम पड्किन्छ सरकार दोषी को हो भन्दैन। सरकारसँग सूचना छैन। कसले पड्कायो भन्ने पनि थाहा नपाउने उहाँहरुको थियो।‘
