माफिया राज


गरिबका घाउहरूमा

डाक्टर केसीले

मलमपट्टी लगाएको

ऊ देख्न सक्दैन

व्यथाले गलेका

अभावले जलेका

अनाथ-असहायहरूको आवाज

डाक्टर केसीले बोलेको

ऊ सुन्न सक्दैन

ऊ अर्थात्

यो देशको एउटा माफिया-राज !

 

उसका काला कर्तुतहरूको फेहरिस्त

यति लामो भइसक्यो कि

त्यो लम्बिदै-लम्बिदै

मेरै छेउमा आइसक्यो

थिच्न थालिसक्यो मेरै श्वासनली

गुहार,

मलाई श्वास फेर्न सकस भइसक्यो!

 

आँखै अघिल्तिर देख्दै छु- हामी असहाय र निर्बल मान्छेहरूको बस्तीमा

ऊ छिरिसक्यो

अरूको जस्तै

मेरो रगतकको स्वादमा पनि जिब्रो पड्काउन

ऊ आतुर छ

मेरो मुटु र कलेजोको सितन खान

ऊ तम्तयार छ

मेरो टाउको र नलीहाडको सुप पिउन

ऊ उत्साहित छ

ऊ अर्थात्

यो देशको एउटा

नरभक्षी गुन्डाराज!

 

स्याल र ब्वाँसोसँगको प्रतिस्पर्धामा

निकै अघि बढिसकेको ऊ

यति धूर्त छ कि

मान्छेको अघि मीठो गुड्डी हाँक्छ

समाजहितको जाल छर्छ

सर्वहाराको झन्डा बोक्छ

र त्यही झन्डाको बल्छी बनाएर

नरभक्षण गरिबस्छ

ऊ अर्थात्

यो देशको एउटा

पिचास-नायक !

 

औषधिमूलो नपाएका

रोगीलाई डाक्टर केसीले औषधि दिँदा

ऊ रिसले आगो हुन्छ

मृत्युको मुखबाट

दुस्खी-गरिबलाई

डाक्टर केसीले बचाउँदा

ऊ केसीको शत्रु बन्छ

यो देशको एउटा ठूलो

विसङ्गतिको पिलो

डाक्टर केसीले निचोर्न खोज्दा

ऊ छटपटीमा पर्छ

ऊ अर्थात्

यो देशको एउटा

अद्भुत माफिया-राज!

Share:

© 2017 Setopati Sanchar Pvt. Ltd.