हे स्त्री
सत्ययुगले तिमीलाई सती बनायो
र भन्यो -
पतिको आत्मसम्मानको रक्षा गर्न
आफूलाई जिउँदै आगोमा जलाउन सक्ने
हे महान स्त्री
अब लेखिनेछ तिम्रो महानताको गाथा
परम्परागत रूपमा चल्नेछ युगौंसम्म
तिम्रो त्यागको सिलसिला
बन्नेछ सती प्रथा
त्रेतायुगले सीता बनायो
र भन्यो -
हे पतिव्रता महान स्त्री
आफ्नो शुद्धताको प्रमाण दिन अग्नि परीक्षाबाट गुज्रन सक्ने,
पतिको बचनको सम्मान गर्न चुपचाप वनवास हिँड्न सक्ने,
तिम्रो समर्पणको लेखिनेछ उचाइबाट नयाँ इतिहास
द्वापर युगले महाभारत रच्यो
द्रौपदी बनाउँदै भन्यो-
हे स्त्री
कति हृदय विदारक छ तिम्रो पीडाको कहानी
पटक-पटक पुरुष पात्रबाट लुटिएकी
तिम्रो गरिनेछ इतिहासभरि दुखान्त चर्चा
हिजो बलिदानको खेप्नै नसक्ने शैयामाथि सुताएर
महानताको पदक गुथाउँदै भनियो -
हे स्त्री तिमी सबै देवी हौ
तिम्रो उच्चताको कालान्तरसम्म गरिनेछ जयजयकार
तर, कसैले कहीँ दिएनन्
तिमी सबैलाई न्यायको प्रत्याभूति
सीता!
हिजो पनि भएको हो तिम्रो योनीको परीक्षा
गर्भवती तिमीलाई परित्याग गर्ने
तिम्रो आदर्श पतिलाई
उल्टै रामराज्यको महापुरुष ‘मर्यादा पुरुषोत्तम’ भनियो
इच्छाविरूद्ध आफ्नै पत्नीलाई वस्तु बनाएर
जुवाको दाउमा थाप्ने युधिष्ठिरलाई धर्मराज भनियो
खै कहाँ चुक्यो इतिहास
नारी अस्तित्वको उपहास गर्न?
इतिहासकै गर्भबाट निकालिएका हुन्
माधवी र अम्रपालिहरू
इतिहासले नै त जन्माएको हो
अम्बा, अम्बिका र अम्बालिकाहरू
दास र सामन्ती युगले
विवाहको सर्टिफिकेट थमाएर
घरेलु हिंसा, यौन उत्पीडन
र, बलात्करलाई वैधानिकता दिँदै
भनेको हो-
हे स्त्री तिमीहरू घरको शोभा हौ
महलको रौनकता हौ
तिमी नहुँदा महल शून्य हुन्छ, घर निरस हुन्छ
पुँजीवाद निर्धक्क तिम्रो शरीरको
विनिमय गर्दै महंगो मूल्यमा,
बजारमा पुर्याउँदै भनिरहेको छ
- हे स्त्री अब तिमी स्वतन्त्र भयौ
सौन्दर्य प्रसाधनका साधनहरूमा लतपताएर
बनाउँदै कस्मेटिक गुडिया
तिम्रो यौनाङ्गको मूल्य निर्धारण गरी
थाहै नपाई तिम्रो खरीद-बिक्री गर्दै
देखाइरहेको छ उन्मुक्तिको झुटो सपना
निर्मला पन्त, सम्झना कामी,
गीता ढकाल, गुलाव खातुन
तिमीहरू संरचनागत हिंसा र बलात्कारका सिकार हौ
यो वर्तमान तिम्रो नाममा
सती, सीता र द्रौपदी दोहोराइरहेको छ
अब हुनेछ यो युगभरि तिम्रो हत्या र बलात्कारको चर्चा
लेखिनेछ तिम्रो सहानुभूतिमा गीत र कविता
भरिनेछ अखबार
तर, दिनेछैन यो पटक पनि राज्य न्यायको प्रत्याभूति
तिम्रा इच्छा, आकांक्षा, हौसला र स्वतन्त्रता पटक-पटक निमोठ्दै
भौतिक र मानसिक रुपमै
तिमीलाई बारम्बार बलात्कार गरिरहने
हे स्त्री याद गर
यो पितृसत्ता बलात्कारीहरूको साम्राज्य हो!
1607141744.jpg)
