भत्किनै आटेको घरको भित्ता
सहरको
कोचाकोच माइक्रोमा खलासी अडिएझैं
अडिएको छ
पोहोर साल लिपेको गोबर र माटोको पाप्रा
गाडीभित्र सिटमा बसेको मान्छेले
झ्यालबाट बाङ्गो मुन्टो लगाएर
अगाडिको बाटो हेरेझैं
हेरेको छ
भित्ताको पाप्राले
सहरबाट फर्किनेको बाटो
पिँढीमा फुल्न लागेका फूलका गुथा
सहर पसेकाले घर सम्झिउन् या बिर्सिउन्
एक पटक मज्जाले सम्झँदो रै’छ घरले
सहर पसेको छोरो आओस्
र
उखालोस् भनेर बसेको छ
घरवरिपरिको झार
बुहारी आओस्
र
लिपोस् भनेर
गेरू र छिर्के मिर्के अनुहार लिएर
बसेको छ घरको भित्तो
तर
छोरो आउँछ टीका थाप्ने दिन पारेर
बुहारी आउँछे उसैदिन
नातिनातिना आउँछन् उसैदिन
उसै पनि छैन दसैं पहिलेझैं रमाइलो
गाउँमा पिङ छैन
केटाकेटीको हो हल्ला कम छ
दुर्गा पूजा छैन
रात्रिकालीन चहलपहल पनि कम छ
उसै पनि दसैं पहिलेझैं छैन
जमाना अनुसार रमझम
साँघुरिँदै छ
पहिले जस्तो निधार पूरै ढाक्ने गरी
टीकाको क्षेत्रफल हुँदैन आजकल
निधारमा हुने टीकाको क्षेत्रफल
साँघुरिँदै छ
जसरी साँघुरिँदैछ दसैंको रमझम
प्रकाशित मिति: आईतबार, असोज १९, २०७६, ०३:३७:००
