कुनैबेला थियो, बाइक वा साइकलमा जर्किनमा भरेर भारततिर इन्धन तस्करी हुन्थ्यो। पछिल्लो समयमा भने ट्यांकरबाटै तस्करी भइरहेको पाइएको छ।
यसरी ट्यांकरमै इन्धन तस्करी हुनुको मुख्य कारण नेपालमा भन्दा भारतमा महँगो मूल्य पर्नु हो। इन्धन व्यवसायीका अनुसार नेपालमा भन्दा भारतमा डिजल प्रतिलिटर २५ रुपैयाँ महँगामा बिक्री हुने गरेको छ। यही 'लोभ'मा तस्करी मौलाएको हो।
विराटनगरमा डिजल लोड गरी भारततर्फ जान लागेको ट्यांकर नियन्त्रणमा लिएसँगै भारतबाट आयात भएको इन्धन भारततिरै तस्करी हुने गरेको रहस्य बाहिर आएको छ।
शनिबार इन्धन लिनका लागि भारत जाने तयारीमा रहेको १ ख ५९१२ नम्बरको ट्याङ्कर जाँच गर्दा दुई हजार ६ सय ६० लिटर डिजल फेला परेको थियो।
ट्याङ्करको दुई नम्बर च्याम्बरमा आधा लोड गरिएको अवस्थामा डिजेल भेटिएपछि नेपाल आयल निगम प्रदेश १ कार्यालय विराटनगरले मोरङ प्रहरीलाई खबर गरेको थियो।
भारत अररिया जिल्ला मिरगन्जका चालक र सह–चालक २६ वर्षीय मोहमद सजाद र २१ वर्षीय इमरोज आलमलाई प्रहरीले पक्राउ गरी अनुसन्धान गर्दा उनीहरूले डिजल तस्करी गरी भारत लैजाने तयारी गरेको खुलेको प्रहरीले जनाएको छ।
भारतको बरौनी डिपोबाट शुक्रबार आयल निगम विराटनगरका लागि आएको ट्याङ्करमा २० हजार लिटर पेट्रोल लिएर आएको सो ट्याङ्करको अटोमेटिक रूपमा लक गरिएको चाबी आयल निगममा खोलिएको थियो। त्यसपछि उक्त ट्याङ्करले बेलबारीमा रहेको २ वटा, विराटचोक र सुनसरीको तरहरामा रहेको १ वटा पेट्रोल पम्पमा समान ५/५ हजार लिटरको दरले पेट्रोल अनलोड गरेपछि बुढीगंगा गाउँपालिका ४ नेमुवामा रहेको नितेश आयलमा डिजल लोड गरेको खुलेको छ।
ट्याङ्कर ढुवानी व्यवसायी संघ मोरङका सचिव चरणप्रित सिंहको हो। उनको आधा दर्जन यस्ता ट्यांकर छन्। व्यवसायी, ट्याङ्कर चालक र सह-चालकको मिलेमतोमा इन्धन भारततर्फ तस्करी गरेको हुनसक्ने भएकोले प्रहरीले त्यसतर्फ पनि अनुसन्धान अगाडि बढाएको छ।
निगमले विराटनगर र बरौनीमा मात्रै लक खोल्ने चाबी रहेको बताउँदै आएको छ। तर बीच बाटोमा तेल अनलोड हुने भएका कारण चोरीमा गिरोह नै सक्रिय रहेको प्रहरीको आशंका छ।
भारतमा इन्धन महँगो भएका कारण निगमले भारत जाने खाली ट्याङ्करमा पनि लक लगाउने गरेको थियो। शनिबार लक लगाउने क्रममा डिजेल लोड गरेको अवस्थामा भेटिएको नेपाल आयल निगम प्रदेश १ विराटनगरका प्रमुख नकुल भण्डारीले जानकारी दिए।
‘शुक्रबार बरौनीबाट आएको ट्याङ्करले सोही दिन डिपोमा ढुवानी गरी शनिबार निगममा आएको थियो,’ उनले भने, ‘हामीले भारत जाने खाली ट्याङ्करमा पनि लक गर्ने गरेका थियौं, जसको चाबी विराटनगर र बरौनी डिपोमा मात्रै हुन्छ, तर लक गर्ने क्रममा शङ्का लागेर हेर्दा ट्याङ्करमा डिजल भेटियो।’
