मनभरि व्यापार गर्ने हुटहुटी थियो, लगानी गर्न साथमा पैसा थिएन।
बाग्लुङको बुर्तिबाङ नगरपालिकाको विकट गाउँ बोंगादोभानका शंकर रसाइली बुर्तिबाङ बजार गए। खल्तीमा जम्मा–जम्मी ८ सय रुपैयाँ थियो। त्यही पैसाले आउने खुद्रा सामान किने, गाउँमा लगेर घरघरमा लगेर बेचे।
त्यतिबेलाको बजार अहिले जस्तो घरमै अर्डर अनुसारको सामान पुर्याइदिने ‘होम डेलिभरी’ थिएन।
नेपालका ग्रामीण बजारमा अहिले पनि यो सुविधा छैन। ३५ वर्षअघि ८ सय रुपैयाँले सुरू गरेको घरघरमै सामान पुर्याउने काम उमेरले ५८ लागेका शंकरले अहिले पनि जारी राखेका छन्।
त्यही सामान बेचेर आउने मुनाफाबाट शंकरले गुजारा चलाए। छोराछोरीलाई पढाए, हुर्काए। शंकरका ५ छोरी र १ छोरा छन्। गाउँमै एसएलसीसम्म पढेका छोरा रेम रसाइली क्याम्पस पढ्न पोखरा झरे। स्नातक अन्तिम वर्ष पढ्दा–पढ्दै पत्रकारिता थाले।
पत्रकारितामा उनलाई रंग समाचारमा चाख बस्यो। उनी चलचित्र पत्रकार संघ, पोखराका अध्यक्ष भए। पत्रकार भए पनि उनलाई व्यापार गर्ने बुवाको मोहले छाडेको थिएन।
पत्रकारिता छाडेर उनले २ वर्ष ठेक्का–पट्टाको काम थाले। सरकारी ठेक्का समेत लिन अग्रसर भएका रेम ठेक्का–पट्टामा घाटा लाग्यो, उनले ठेकेदारी गर्न छाडिदिए।
कोरोना भाइरसको महामारीले देशव्यापी लकडाउन भयो। चलचित्र पत्रकारिता गर्दा उनले कलाकारिता पनि सिकेका थिए। केही म्युजिक भिडिओमा अभिनय समेत गरेका छन्।
त्यही कलाकारितालाई प्रष्फुटन गर्न उनले लकडानमा केही सर्ट फिल्म बनाउन अघि सरे। आफैंले अभिनय गरे। त्यही लकडाउन खुलेपछि उनले पोखरामा व्यापार गर्ने योजना बनाए। पोखराको पस्र्याङमा कात्तिक १ गतेदेखि ‘रेजा मार्ट’ नामक व्यवसाय सुरू गरे।
पत्रकारिता, ठेेकेदार, कलाकार हुँदै उनले व्यवसायमा हात हालेका हुन्। पोखराको पर्साङमा ‘रेजा मार्ट’ सञ्चालनमा ल्याएका रेमले यसको श्रेय भने आफ्ना बुवालाई दिन्छन्।
‘गाउँमा हरेक घरका ढोकामा पुगेर सामान बेच्न बुवाले पैतला खियाएर दु:ख गरेकैले आज रेजा मार्ट खोल्न प्रेरणा दियो’, रेमले भने।
सामान बेचेर फाइदा लिनेभन्दा पनि बुवाले गाउँमा घर-घरमा अत्यावश्यक सामान पुर्याएर सेवा गरेको बताउँछन्।
घरमै सामान ल्याइदिने मान्छे पाएपछि गाउँले पनि खुसी भए, शंकरले लगेको सामान गाउँलेले खुसी भएर किन्थे।
अहिले पनि बुवाले यो काम जारी राखेको रेम बताउँछन्।
‘बुवाले घरघरमै सामान पुर्याउने काम गरिराख्नुभएको छ’, उनले भने, ‘अहिले पनि बजारबाट गाउँ जाँदा बुवाले झोलाभरी गाउँलेलाई बेच्ने सामान राख्नुहुन्छ।’
पोखरामा रेमले सञ्चालनमा ल्याएको रेजा मार्टले पनि आफ्ना ग्राहकलाई पोखराभरि घरमै डेलिभरी सुविधा दिएका छन्।
उनले सामाजिक सञ्जाल र वेबसाइटमार्फत् सामान अर्डर गर्न सक्ने बताए।
‘बुवाले सुरू गर्नुभएको व्यापारको विस्तारित रूप रेजा मार्ट हो’, रेमले भने, ‘बुवाको पदचाप पछ्याउँदै उही व्यापारलाई नयाँ स्वरूपमा सञ्चालन गर्न पाउँदा खुसी लागेको छ।’
उनले खोलेको रेजा मार्टमा गल्ला किराना (ग्रोसरी आइटम)सँगै फूड एण्ड स्न्याक्स, कस्मेटिक्स, हाउसहोल्ड एण्ड क्लिनिङ, मासुजन्य पदार्थ, डेरी एण्ड बेकरी, लिक्वयर एण्ड टोबाको र फलफूल तरकारीको सेक्सन छन्। एकै छानामुनि घरमा आवश्यक सबै सामग्री विक्रीका लागि राखिएको रेमले बताए।
‘बुवाले अपनाएकै व्यापार नीति हामीले अपनाएका छौं’, उनले भने, ‘नाफा कमाउनेभन्दा पनि ग्राहकलाई सेवा र सन्तुष्टी दिनेमा हाम्रो ध्यान हुनेछ।’
उनका अनुसार रेजा मार्ट सञ्चालनमा झण्डै १ करोड रुपैयाँ लगानी भएको छ।
उक्त रेजामार्टको उद्घाटन बिहीबार चर्चित लोकगायक एवं नायक प्रकाश सपुतले उद्घाटन गरे।
उद्घाटनमा बोल्दै रमेले बुवाले भनेका कुरा सम्झिए।
‘व्यापारमा धेरै नाफा हेर्नु हुँदैन भनेर मलाई बुवाले सिकाउनुभएको छ’, उनले भने, ‘बरु कम नाफा राख्नु, धेरै सामान बेच्नु भन्ने बुवाको आशीर्वादलाई शिरोपर्य गर्छु।’ व्यवसायलाई समयसँगै अपडेट गर्ने उनले प्रतिवद्धता जनाए।
ग्राहकलाई सजिलो होस् भनेर वेबसाइट र सामाजिक सञ्जालमै विक्रीका लागि राखिएका सामग्रीको मूल्य पनि राखिने उनले बताए।
उनले पोखराका अन्य क्षेत्रमा पनि रेजामार्टको आउटलेट विस्तार गर्ने बताएका छन्।
‘आगामी ५ वर्षभित्र गण्डकीका अन्य सहरमा पनि हामी रेजा मार्टको विस्तार गर्नेछौं’, उनले भने।
रेजामार्टको उद्घाटन गर्दै गायक प्रकाश सपुतले स्वरोजगार बन्न नयाँ व्यवसाय थालेको भन्दै रेमलाई शुभकामना दिए।
