कृषि तथा पशुपंक्षी विकास मन्त्री पद्माकुमारी अर्यालले पुँजीको विकास गर्न सबै मान्छे श्रममा जोडिनुपर्ने बताएका छन्।
थनेत प्लानेट फार्म प्रालि थापागाउँ काठमाडौंको आज (शुक्रबार) उद्घाटन गर्दै मन्त्री अर्यालले सो कुरा बताएकी हुन्।
पुँजीको विकास गरेर समाजवादमा जोडिने भन्दै मन्त्री अर्यालले पुँजीको विकास गर्न सबै मान्छे श्रममा अनिवार्य रूपमा श्रममा जोडिनुपर्ने बताइन्।
‘अब सबै मान्छे श्रममा नजोडिइकन पुँजीको विकास गर्न सकिँदैन। पुँजीको विकास गर्दै समाजवादमा जोडिने हो’, कृषिमन्त्री अर्यालले भनिन्, ‘पुँजीको विकास गर्न सबै मान्छे श्रममा अनिवार्य रूपमा जोडिनुपर्छ।’
श्रमलाई सम्मान गर्ने वातावरणको विकास गर्दै जानुपर्ने अहिलेको आवश्यकता भएको भन्दै उनले किसानलाई सम्मान नगर्ने हिजोको प्रचलनलाई बदलेर अब श्रमलाई सम्मान गर्ने प्रवृत्तिको विकास गर्नुपर्ने बताइन्।
उनले भनिन्, ‘विगतमा श्रम गर्ने, खेती किसानी गर्ने मान्छेलाई सम्मान गर्ने प्रचलन हामीकहाँ थिएन। तर, अब त्यो सोच बदलौं। श्रम र श्रम गर्ने मान्छेलाई सम्मान गरौं। श्रम गर्ने मान्छेलाई उत्साहित बनाउन सिकौं।’
विदेश गएर फर्किएका धेरै युवाहरू अहिले व्यवसायिक रूपमा कृषि कर्ममा लागेको बताउदै उनले अब स्वदेशमै रहेर बेरोजगार रहेका युवाहरूलाई पनि यसतर्फ आकर्षित गर्न आवश्यक रहेको बताइन्।
‘विदेश गएर आएका युवाहरूले त त्यहाँ देख्नुभयो, अनुभव गरेर स्वदेशमा आएर लागू गर्नुभएको छ’, मन्त्री अर्यालले भनिन्, ‘तर अब यहाँ पनि ठूलो संख्यामा युवाहरू हुनुहुन्छ। जसले काम नपाएर बसिरहेको अवस्था छ। ती युवाहरूलाई पनि हामीले व्यवसायिक कृषि कर्ममा आकर्षित गर्नुपर्नेछ।’
कृषकले उत्पादन गरेका वस्तुले बजार नपाउने समस्याको अन्त्य गर्न आफू भूमि व्यवस्था, सहकारी तथा गरिबी निवारण मन्त्रालयमा रहँदा सहकारीमार्फत् सहकारी बजार विकास कार्यक्रममार्फत् कृषि बजारहरू सञ्चालन गरिएको स्मरण गर्दै मन्त्री अर्यालले सरकारले केन्द्र, प्रदेश र स्थानीय ३ तहको बजारको परिकल्पना गरेको र छिट्टै लागू गरिने बताइन्।
प्रधानमन्त्री कृषि आधुनिकीकरण कार्यक्रम अन्तर्गत कृषिमा यान्त्रिकीकरणको कार्यक्रम अगाडि बढाइएको बताउँदै उनले सरकारका कार्यक्रमहरूलाई सहयोग पुर्याउने गरी विभिन्न संघसंस्थामार्फत् गरिएको प्रयास सराहनीय रहेको बताइन्।
