चालू आर्थिक वर्ष २०७६/०७७ को साउनदेखि माघसम्ममा वैदेशिक लगानी प्रतिबद्धता २८ अर्ब ८१ करोड ७२ लाख रूपैयाँ आएको छ। १५ देशका लगानीकर्ताले उद्योग विभागमार्फत् उक्त रकम बराबरको लगानी प्रतिबद्धता गरेका हुन्।
गत आर्थिक वर्ष २०७५/०७६ को सोही अवधिको तुलनामा यो १ सय ६० प्रतिशतले बढी हो। गत साउनदेखि माघसम्ममा विभिन्न देशका लगानीकर्ताले १ सय १२ वटा परियोजनामा ११ अर्ब ६ करोड रूपैयाँ बराबरको लगानी प्रतिबद्धता जनाएका थिए।
देशमा स्थिर राजनैतिक अवस्था र विदेशी लगानीलाई लक्षित गरि ऐन नियम तर्जुमा तथा संशोधन हुँदै जाँदा वैदेशिक लगानी पनि आकर्षित भएको उद्योग विभागका महानिर्देशक जीवन प्रकाश सिटौलाले बताए।
‘अहिले हामीले विभिन्न ऐन, नियम संशोधन गर्दै गएका छौँ, त्यसले वैदेशिक लगानी प्रतिवद्धता पनि बढ्दै गएको हो,’ उनले भने, ‘यो लगानी प्रतिबद्धतालाई लगानीमा परिणत गर्न हामी सक्दो प्रयासमा छौं।’
साउनदेखि माघसम्ममा दर्ता भएका १ सय ६१ वटा परियोजनामध्ये सबैभन्दा बढी पर्यटनमूलक क्षेत्रमा ६१ वटा परियोजनामा लगानी प्रतिबद्धता आएको छ।
त्यस्तै दोस्रो सेवामूलकमा ४२, सूचना प्रविधिमा २९, उत्पादनमूलकमा २१, ऊर्जामूलक ५, र कृषि तथा वनजन्यका ३ वटा परियोजनामा लगानी प्रतिबद्धता आएको विभागले सार्वजनिक गरेको तथ्याङ्कले देखाएको छ।
उद्योगको. कुल पूजिँ ४१ अर्ब ८७ करोड १८ लाख रहेको छ। यी उद्योग सञ्चालनमा आए ८ हजार भन्दा बढीले रोजगारी पाउने संभावना देखिएको छ।
कुन देशको कति लगानी
लगानी प्रतिबद्धता गर्नेमा सबैभन्दा अघि चीन रहेको छ। चिनियाँ लगानीकर्ताले १ सय २५ परियोजनामा १७ अर्ब ५९ करोड रूपैयाँ लगानी प्रस्ताव गरेका छन्।
दोश्रोमा भारतीय लगानीकर्ताले ११ परियोजनामार्फत् २ अर्ब ९३ करोड रूपैयाँ बराबरको लगानी प्रस्ताव गरेका छन्।
बेलायती लगानीकर्ताले ४ परियोजनामा १ अर्ब ९२ करोड रूपैयाँ लगानी प्रस्ताव गरेका छन्।
अमेरिकाले ३ वटा परियोजनामार्फत ४ अर्ब १७ करोड, साउथ कोरियाले ३ वटा परियोजनामा २५ करोड रूपैयाँ लगानी प्रस्ताव गरेका छन्।
अष्ट्रलिया, फ्रान्स, जापान, पाकिस्तान र अरबलगायतका मुलुकले २ वटा परियोजनामार्फत् क्रमशः १० करोड, २५ करोड, १० करोड, १० र ४८ करोड रूपैयाँ लगानी प्रस्ताव गरेका छन्।
त्यस्तै बंगलादेश, क्यानडा, चीन (हङकङ), मलेसिया र पोल्याण्डबाट एउटा परियोजनामा क्रमशः १५ करोड, ५० करोड, ५ करोड, ५ करोड र १५ करोड रूपैयाँ बराबरको लगानी प्रस्ताव आएको छ।
