अमेरिका र चीनको व्यापार युद्धमा पहिलो चरणको सहमति भएको छ। अमेरिकाले आइतबारदेखि लागू हुनेगरी यसअघि बढाएको कर वृद्धि स्थगित गरेको बताएको छ।
दुवै देशको बीचमा बिहीबार सहमति भएको विदेशी संचार माध्यमले जनाएका छन्। यो सहमतिसँगै १७ महिनादेखि चर्किएको व्यापार युद्ध तत्कालका लागि रोकिने संकेत देखिएको छ।
केही अमेरिकी संचार माध्यमले अमेरिकी राष्ट्रपति डोनाल्ड ट्रम्पले उक्त सम्झौतामा हस्ताक्षर गरिसकेको बताएका छन्।
सहमति आइतबारबाट लागू हुने छ। जसअनुसार १ सय ६० अर्ब डलरको चिनियाँ आयातमा अमेरिकाले लगाउँदै आएको शूल्क लाग्ने छैन।
यसअघि इलेक्ट्रिोनिक्स तथा खेलौनामा अमेरिकाले कर लागाउँदै आएको थियो।
यस्तै, चीनबाट आयात हुने केही सामानमा ५० प्रतिशतसम्म भन्सार छुट दिने सहमति भएको बताइएको छ। यसले अमेरिकी कम्पनीहरुलाई २.५ अर्ब अमेरिकी डलर मासिक रुपमा बचत हुनेछ।
सहमतिअनुसार चीनले अर्को वर्ष ५० अर्ब अमेरिकी डलरको कृषि उत्पादन तथा अन्य उत्पादन खरिद गर्ने भएको छ।
पछिल्लो १२ महिनामा अमेरिकी कृषि उत्पादनकाे निर्यात ७२ प्रतिशतसम्म कमी आएको थियो। व्यापार युद्धका कारण चीनले अमेरिकी कृषि उत्पादनको आयात बन्द गरेकाले निर्यात घटेको हो।
अमेरिकी वाणिज्य विभागको तथ्याङकअनुसार पछिल्लो एक वर्षमा अमेरिकाको कृषि उत्पादनको निर्यात २५ अर्ब डलरबाट घटेर ७ अर्ब डलर पुगेको थियो।
यस्तै, व्यापार युद्धकै कारण पछिल्लो समय दुवै देशको आर्थिक वृद्धि घटिरहेको थियो। चिनियाँ आर्थिक वृद्धि २७ वर्षकै न्यून स्थानमा पुगेको बताइएको छ।
व्यापार युद्धमा भएको सहमतिको खबरसँगै एशियाली शेयर बजार पनि बढ्न थालेको छ।
