नेपाली काँग्रेसका सांसद संजयकुमार गौतमले पर्यटन मन्त्रालयमा नयाँ जिम्मेवारी नदिंदा निर्णय प्रक्रिया रोकिएका बताएका छन्। प्रधानमन्त्रीले अरुलाई जिम्म्वारी नदिंदा मन्त्रालय मातहातका काम प्रभावित भएको बताए।
आजको प्रतिनिधिसभाको बैठकलाई सम्बोधन गर्दै गौतमले नेपाल एयरलाइन्समा दैनिक बेथिति बढ्दै गएको,नागरिक उड्डयन प्राधिकरणमा एक महिनादेखि निमित्तको भरमा चलेको बताउँदै उनले दैनिक काम कारबाहीसमेत प्रभावित हुँदा प्रधानमन्त्री गम्भिर हुन नसकेको आरोप लगाए।
'नेपाल एयरलाइन्स दैनिक करोडको घाटामा गएको छ, पर्यटक बढाउन बलियो हुनुपर्ने ध्वजाबाहकमा अनियमितताका चाङ लागेका छन्। हवाई क्षेत्रको नियमक नै तदर्थबादमा चलिरहेको छ। यस्तोमा प्रधानमन्त्री भने आफै होल्ड गरेर बस्नुभएको छ। त्यो मन्त्रालयमा के छ त्यस्तो उहाँले अरुलाई विश्वास गर्नुहुन्न?' गौतमले भने।
तत्कालिन पर्यटन मन्त्री रविन्द्र अधिकारीको हेलिकप्टल दुर्घटनामा निधन भएपछि मन्त्रालयको जिम्मेवारी प्रधानमन्त्री केपी शर्मा ओलीले सम्हालेका छन्।
मन्त्रालयको प्रधानमन्त्रीका काम एउटा मन्त्रालयमात्र भन्दा पनि अरु धेरैतिर काम हुने भएकोले विभागीय मन्त्री नहुँदा पर्यटन प्रबर्द्धनका कामसमेत प्रभावित भएको स्वयम् मन्त्रालयका अधिकारीहरुले बताउँदै आएका छन्।
तर पनि उनले अहिलेसम्म मन्त्री नियुक्त गरेका छैनन्।