नवलपुरको देबचुली नगरपालिकाका हुरी पीडितलाई चौधरी फाउण्डेशनले एक सय बण्डल जस्तापाता सहयोग उपलब्ध गराएको छ।
नेपाली कांग्रेसका सांसद एवं चौधरी फाउण्डेशनका अध्यक्ष बिनोद चौधरीले आफ्नो जिल्लामा हुरी र असिना पानीले क्षति पुर्याएलगत्तै सहयोग उपलब्ध गराएका हुन्।
जेठ ७ र ८ गतेको हुरी तथा असिना पानीले नवलपुरका दुई सयभन्दा धेरै घरका छानो उडाएको छ। ‘नवलपुरमा आएको हुरी तथा असिना पानीले आम नागरिकमा पुर्याएको असरबाट मर्माहत छु, यहाँको जनप्रतिनिधिका हैसियतले यस दुःखद घडीमा म यहाँहरूको साथमै छु’ सांसद चौधरीले नवलपुरवासीलाई पठाएको सन्देशमा भनेका छन्।
पीडितमध्ये पनि आर्थिक रुपमा विपन्न र सर्वाधिक प्रभावित परिवारलाई उच्च प्राथमिकतामा राखेर सहयोग वितरण गर्ने व्यवस्था मिलाइएको फाउन्डेसनले जनाएको छ। सांसद चौधरीले उपलब्ध गराएको सहयोग करिब १० लाख रूपैया“ बराबर रहेको छ।
