नेपालका विमानस्थलमा रहेका विभिन्न प्राविधिक उपकरणको परीक्षणको काम शुरु भएको छ। नागरिक उड्डयन प्राधिकरणले वर्षेनी गराउँदै आएको यो वर्षको उक्त परीक्षण भने चाइ कम्पनीले गरिरहेको छ।
राडार(रेडियो डिटेक्सन एण्ड रेन्जिङ) तथा सञ्चार उपकरणको परीक्षणको काम शुरु भएको नागरिक उड्डयन प्राधिकरणले जानकारी दिएको छ। अघिल्लो वर्ष अमेरिकी कम्पनीले गरेको यस्तो परीक्षण यो वर्ष भने एरोथाईले गरिरहेको छ। यस्तो काम मंगलबारबाट शुरु भएको नेपाल नागरिक उड्डयन प्राधिकरणका उपनिर्देशक ईन्जिनियर संजिवसिंह कठायतले जानकारी दिए।
खुल्ला प्रतिस्पर्धाबाट छनौट भएको एरोथाइको परीक्षण टोली बिचक्राफ्टको बी–३०० सिरिजको जहाज ल्याएर काठमाडौं आएको छ। उक्त टोलीमा सातजना सहभागी रहेको प्राधिकरणले जानकारी दिएको छ।
विमानस्थलहरुको फ्लाइट इन्स्पेक्सन काम गर्नेगरी आएको उक्त टोलीले जेठ चारसम्म परीक्षण गर्ने छ। उनीहरुले सबै उपकरणको अवस्थाको बारेमा विस्तृत प्रतिवेदन प्राधिकरणलाइ बुझाउने छन्।
यो टोलीले परीक्षण गरेपछि उपकरणको मर्मतसम्भार, प्रतिस्थापन गनुपर्ने वा सामन्य मर्मतका लागि सिफारिस गर्ने छ। सोहीअनुसार प्राधिकरणले काम गर्ने छ।
