जाजरकोट नलगाड नगरपालिका–७ दल्लीमा निर्माण हुन थालेको नलगाड जलविद्युत् कम्पनीको सुरुङमार्गको काम रोकिएको छ।
तीन सय ४५ मिटर लामो भूमिगत सुरुङ निर्माण गरी माटोको अवस्था पत्ता लगाउन विगत ३५ महिनादेखि काम सुरू भएकामा अहिले (रिप, रिङ) सुरुङभित्र माटो, ढुङ्गा अड्याउने साधन नहुँदा काम रोकिएको छ।
एकतीस महिनाभित्र (डिपिआर) विस्तृत योजना प्रतिवेदन तयार पारेर कम्पनीलाई दिनुपर्ने हो तर निर्धारित अवधिमा छ महिना थपे पनि सो मिति सकिन लाग्दासम्म कामले गति लिनसकेको छैन।
विद्युतगृह निर्माणका लागि ३४५ मिटर सुरुङ निर्माण गरी माटोको अवस्था पत्ता लगाउन काम सुरू भए पनि मिति सकिन दुई महिना बाँकी रहँदासम्म १८५ मिटर मात्र निर्माण गरिएको आयोजनाका इञ्जिनियर पदम थापाले बताए।
इञ्जिनियर थापाले भने, ‘डिपिआर तयार गर्न बारेकोट गाउँपालिकाको अँधेरीखोलामा चार वटा ६० मिटर गहिराइका प्वाल पार्नुपर्ने भए पनि अहिलेसम्म दुई प्वाल ४० मिटर गहिराइमा छेडिएको छ भने बाँकी दुई प्वाल २५ मिटर छेडिएको छ, ३५ मिटर अझै छेड्न बाँकी छ।’
स्मेक कम्पनीले सेन्चुरी कन्स्ट्रक्सन प्रालि सानेपा ललितपुरलाई भूमिगत प्वाल पर्ने जिम्मा दिएअनुसार काम भएको कन्स्ट्रक्सनका प्रमुख वसन्त डिसीले बताए।
पचासभन्दा बढी माटो, ढुंगा अड्याउने (रिप, रिङ) मेसिन आवश्यकता पर्ने भएकाले सो मेसिन नहुँदा अहिले काम रोकिएको प्रमुख डिसीले जानकारी दिए। हप्ता दिनभित्र सबै रिप निर्माण हुने, त्यसपछि मात्र काम सुरू हुने बताए।
निर्माणका लागि तोकिएको मिति आउन दुई महिना मात्र बाँकी रहँदासम्म धेरै काम बाँकी रहेकाले निर्माण हुन समस्या रहेको नलगाड सरोकार समितिका अध्यक्ष तथा सांसद गणेशप्रसाद सिंहले बताए।
उनले भने, ‘काम निरन्तर नगर्दा र ढिलासुस्ती गरिरहेकाले तोकिएको मितिमा काम पूरा नहुने देखिन्छ, बाँधतिर जाने सडकदेखि सुरुङ निर्माणको काममा सम्बन्धित निकायको उदासीनताले जाजरकोटवासी दुखी हुनुपर्ने अवस्था सिर्जना भएको छ।’
नलगाड जलविद्युत् कम्पनी बाँध निर्माणस्थल (बारेकोट गाउँपलिका अँधेरीखोला) जानका लागि निर्माणकार्य भइरहेको सडक निर्माण व्यवसायीले गतिमा काम नगर्दा समस्या भएको सांसद सिंहले सदरमुकाम खलङ्गामा पत्रकार सम्मेलन गरेर जानकारी दिए।
पहुँचमार्गको काम पूरा गर्न अझै कडा चट्टान भएको दुई किलोमिटरभन्दा बढी भूभाग बाँकी रहेको छ भने खारास्थित नलगाड नदीमा निर्माण हुने भनिएको पुल सुरू नै गरिएको छैन। दुई वर्षभित्र निर्माण सम्पन्न गर्ने भनी थालिएको काम पाँच वर्ष बित्न लाग्दासम्म पूरा हुन नसकेको सांसद सिंहले बताए।
बारेकोट गाउँपालिकाको अँधेरीखोलामा जलाशययुक्त बाँध निर्माण गरी भूमिगत सुरुङमार्फत् नलगाड नगरपालिका–७ दल्लीमा विद्युत् उत्पादनगृह निर्माण गर्ने लक्ष्य लिइएको छ । कालीमाटी खन्टाकुरा, सिके हुँदै अँधेरीखोला सडकको लम्बाइ साढे २२ किलोमिटर र कालीमटी, खारा, लैखम हुँदै अँधेरीखोलाको लम्बाइ साढे १० किलोमिटर रहेको कम्पनीले जनाएको छ । बाँधस्थल अँधेरीखोलादेखि दल्ली विद्युत् उत्पादनगृहसम्मको सुरुङमार्गको लम्बाइ आठ किलोमिटर निर्माण गर्नुपर्ने प्राविधिक अनुमान रहेको छ।