नेपाल आयल निगमले आफ्नै नागरिक वडापत्र जारी गर्ने भएको छ।
नेपाल आयल निगमका कार्यकारी निर्देशक सुरेन्द्रकुमार पौडेलले सेवाग्राहीले पाउने सेवाको समयसमेत उल्लेख गरिएको नागरिक वडापत्र जारी गर्न लागिएको जानकारी दिएका हुन्।
उनले सो वडापत्रमा टयांकरले पम्पहरूमा र पम्पबाट नागरिकहरूले कति समयमा पेट्रोलियम पदार्थ पाइसक्ने भन्ने कुरा खुल्ने गरी राख्न टिम नै तयार पारी कामलाई अघि बढाइएको पनि बताए।
पौडेलले सिस्टमको विकास हुन नसकेकाले निगमले सेवाग्राहीहरूको गुनासो सम्बोधन गर्न नसकेको पनि स्मरण गराए।
शुक्रबार पत्रकार सम्मेलन गरी उनले सरकारले जारी गरेको निगमसम्बन्धी नागरिक वडापत्रले सेवाग्राहीको मागलाई सम्बोधन गर्ने अवस्था नरहेपछि आफूले नयाँ वडापत्र जारी गर्ने सोच बनाएको स्पष्ट पारे।
कार्यकारी निर्देशक पौडेलले पेट्रोल पम्पहरूमा पेट्रोलियम पदार्थहरूको अभाव नहुने गरी स्टोर गरिएको स्पष्ट पारे।
आफूले निगमको काम थालेको ४५ दिन भएको र यसबीचमा सबभन्दा बढी पम्पहरूमा पेट्रोलियम पदार्थ स्टोर गर्न आफू सफल भएको कार्यकारी निर्देशक पौडेलको दाबी छ।