प्रदेश नं ३ को भूमि व्यवस्था, कृषि तथा सहकारी मन्त्रालयमार्फत चालू आर्थिक वर्षमा सात आधुनिक पशु बधशाला निर्माण गरिने भएका छन् ।
प्रदेशका उपभोक्ताले प्रयोग गर्ने मासु स्वस्थ र गुणस्तरीय होस् भन्नको लागि र पशुको जथाभावी बध रोक्न बधशाला निर्माण गर्न लागिएको मन्त्रालयका निमित्त सचिव निर्मल गदालले जानकारी दिए।
मन्त्रालयका अनुसार प्रदेशका १३ वटै जिल्लामा आधुनिक पशु बधशाला निर्माण गर्ने सरकारको योजना रहेको भए पनि पहिलोे चरणमा सात मात्र निर्माण सम्पन्न गरिनेछ । बधशाला निर्माणमा सरकारको कूल रु १० करोड बजेटमध्ये पाँच करोडको कामको प्रस्ताव आह्वान भएको मन्त्रालयले जानकारी दिएको छ ।
प्रस्तावअनुसार प्रदेशका १३ वटै जिल्लाका इच्छुक साझेदारले बधशाला निर्माणका लागि प्रस्ताव पेश गर्न सक्छन् भने प्रक्रिया पुगेका प्रस्तावमध्ये आवश्यकता र प्राथमिकताका आधारमा सात जिल्लाका लागि सात बधशाला निर्माणका लागि सम्झौता हुने निमित्त सचिव गदालले जानकारी दिए।
बढीमा एक महीनाभित्रमा शुरु गर्ने गरी काम अगाडि बढेको र सरकारले एक वर्षभित्रमा निर्माण सम्पन्न गर्ने लक्ष्य लिएको मन्त्रालयले जनाएको छ । स्थानीय तह, व्यवसायी कम्पनी, फार्म वा निजी उद्यमीसमेत साझेदार बन्न पाउने फराकिलो व्यवस्थासहित मन्त्रालयले प्रस्ताव आह्वान गरेको निमित्त सचिव गदालको भनाइ छ ।
उहाँका अनुसार प्रस्तावकले प्रस्ताव पेश गर्दा मन्त्रालयद्वारा जारी पशुपक्षी बजार प्रवद्र्धन कार्यक्रम कार्यान्वयन कार्यविधि २०७४ अनुसार बधशाला स्थापना र सञ्चालन गर्न सम्बन्धित भेटेनरी, अस्पताल तथा पशु सेवाविज्ञ केन्द्र र स्थानीय तहको सिफारिस, कार्यविधिअनुसारको प्रस्तावको ढाँचा, बधशालाको संक्षिप्त व्यावसायिक कार्ययोजना, लागत साझेदारी गर्ने प्रतिबद्धतापत्र, बधशाला निर्माणस्थलको जग्गाको स्वामित्व देखिने प्रमाणपत्र पेश गर्नुपर्ने छ ।
