नेपाल राष्ट्र बैंकका डेपुटी गभर्नर चिन्तामणि शिवाकोटीले गल्ती गर्ने जुनसुकै बैंक तथा वित्तीय संस्थालाई कारबाहीको दायरामा ल्याउने बताएका छन्।
नेपाल उद्योग वाणिज्य महासंघ प्रदेश नम्बर ५ को आयोजना तथा सिद्धार्थ उद्योग वाणिज्य संघ, रुपन्देहीको संयोजनमा भैरहवामा आयोजित बैंक तथा वित्तीय संस्थाको व्याज वृद्धिसम्बन्धी छलफल कार्यक्रममा बोल्दै शिवाकोटीले सेवाको नाममा बैंकहरूले चर्को ब्याज लिएर शोषण गरिरहेको गुनासो आइरहेको बताउँदै त्यस्ता बैंकहरूको गतिविधि सप्रमाण उजुरी गर्न आग्रह गरे।
उनले गल्ती भेटिए जुनसुकै बैंकलाई पनि कारबाही गर्ने चेतावनी दिए।
खुला बजार तथा उदार अर्थनीति बमोजिम स्वस्थ प्रतिस्पर्धा गराई बैंकिङ सेवा पुर्याउने राष्ट्र बैंकको आग्रहलाई उल्लंघन गर्ने जोसुकै निकाय कारबाहीको भागिदार हुने उनले बताए।
उद्योगी व्यवसायीहरूसंँग वार्ता र सहकार्य गरी देशको समृृद्धि अभियानलाई अघि बढाउन हातेमालो गर्न आफू तयार रहेको स्पष्ट पारे।
शिवाकोटीले एक पटक प्रिमियम दर निर्धारण गरिसकेपछि, ऋणीलाई कर्जा प्रस्तावमा सो कुरा उल्लेख गरिसकेपछि र कर्जा प्रदान गरिसकेपछि ऋणीको जानकारी बिना सो दर परिवर्तन गर्न नपाउने व्यवस्था रहेको बताए ।
उनले बैंकबाट कर्जा लिनेहरूले बैंकले हस्ताक्षर गराउने कागजातहरू पनि राम्ररी अध्ययन गरी मात्र सहीछाप गर्न समेत अनुरोध गरे।
यता बैंक तथा वित्तीय संस्थाहरूले एकतर्फी रूपले ऋणको ब्याजदरमा अत्यधिक वृद्धि गरेको भन्दै यस क्षेत्रमा उद्योगी व्यवसायी रुष्ट भएका छन्।
नेपाल उद्योग वाणिज्य महासंघ प्रदेश पाँचका अध्यक्ष गुणनिधि तिवारीले आयमूलक उद्योगलाई अधिकतम ७ प्रतिशत र व्यवसायिक क्षेत्रमा अधिकतम ९ प्रतिशत व्याजदर कायम गर्न माग गरे।
तिवारीले बैंक तथा वित्तीय संस्थाहरूले कर्जामा लिने गरेको ब्याजदर सेवाग्राहीलाई जानकारीबिना बढाउने गरेको बेस रेटको आधारमा नहुने गरेको र यस्ता कुराहरूले उद्योगमैत्री वातावरणमा खलल पुगिरहेको भन्दै ब्याजदर निर्धारणमा मापदण्ड बनाउन आग्रह गरे।
सिद्धार्थ उद्योग वाणिज्य संघका अध्यक्ष कुल प्रसाद न्यौपानेले लगानीमैत्री वातावरण बनाउनु पर्नेमा जोड दिँदै बैंक तथा वित्तीय संस्थाले प्रदान गने ऋणको ब्याजका विषयले व्यवसायीमा नैराश्यता छाएको भन्दै उद्योग व्यवसाय गर्न सहज हुने वातावरण बनाउनु पर्नेमा जोड दिए।
फागुन १५ गतेसम्म माग सम्बोधन नभए नेपाल उद्योग वाणिज्य महासंघ प्रदेश नम्बर ५ चरणवद्ध आन्दोलनमा जाने चेतावनी दिएको छ।