अर्थमन्त्री डा युवराज खतिवडाले स्वदेशमा रोजगारी सिर्जना गर्ने र आयात प्रतिस्थापन गर्ने उद्योगहरुलाई सघाउन सरकार सदैव तयार रहेको बताएका छन्। नेपाल गार्मेन्ट एसोसिएसनको वार्षिक साधारणसभालाई सम्बोधन गर्दै खतिवडाले नेपाली तयारी पोसाक उद्योगलाई माथि उठान सरकार हरसम्भव हसयोग गर्न तयार रहेको बताएका हुन्।
काठमाडौंमा आयोजित कार्यक्रममा बोल्दै खतिवडाले सरकारले कुनै पनि वस्तुको मूल्य अभिबृद्धिको आधारमा अनुदान दिने व्यवस्था गरेको र तयारी पोसाक मूल्य अभिबृद्धिको हिसाबले धेरै सम्भावनायुक्त बजार भएको बताए।
कच्चा पदार्थको आपूर्ति, स्वदेशको श्रम सम्बन्ध, श्रमिकको उत्पादकत्व बृद्धिजस्ता कुरामा सरकारले सहयोग गर्ने र त्यसको बदलामा उद्योगीहरुले निर्यात गर्ने, आयात प्रतिस्थापनमा सहयोग पु¥याएर सघाउ पु¥याउने खतिवडाले बताए।
‘तपाईहरु घाटाको व्यापार गर्नुहुन्न सरकार पनि साह्रै घाटाको काम गर्दैन त्यसैले बराबरीको अवस्थामा सहयोग आदान प्रदान हुन्छ’खतिवडाले कार्यक्रममा सम्बोधन गर्दै भने,‘सरकारले रोजागरीको हक शुनिश्चित गर्ने कानून बनाएको छ, रोजगारी नपाएकालाई भत्ता दिने व्यवस्था सरकारको छ, यस्तोमा तपाईहरुका उद्योगमा रोजागरी बढेमा सरकारको पनि बचत हुन्छ, उद्योगीलाई त सरकारले विभिन्न अनुदानमार्फत् सहयोग गरिहाल्छ।’
अहिलेको सरकार दिगो रणनीतिका साथ आएकोले तत्काल केही गर्ने र थिति विगारेर जाने किसिमको नभएकोले अहिले आधारहरु निर्माण गरिरहेको उनले बताए।
‘अहिले हामी दिगो अर्थतन्त्र निर्माणका आधार बनाइरहेका छौं, लगानी, व्यवसायसँग विभिन्न कानून र व्यवस्था बसाउन हामी खोज्दै छौं यसमा तपाईहरुका केही माग छन् हामी सुन्न सदैव तयार छौं’ खतिवडाले भने।
कार्यक्रममा उद्योगी व्यवसायीहरुले श्रम सम्बन्ध, कच्चा पदार्थको व्यवस्थापन, पूर्वाधारमा सरकारले सहयोग गर्नुपर्ने बताएका थिए।
एसोसिएसनका अध्यक्ष चण्डी अर्यालले नेपाली तयारी पोसाक उद्योग कुनै बेलाको मुख्य निर्यात गर्ने वस्तु भएपनि पछिल्लो समय लोप हुने अवस्थामा पुगको भन्दै सरकारले यसको उद्धार गर्नुपर्ने बताए।
व्यवसायीहरुले नेपाली तयारी पोसाको ब्रान्ड निर्माणमा हुने खर्च सरकारले हेरिदिनुपर्ने बताएका थिए। नेपाली कपडाको ब्रान्ड निर्माण नहुँदा स्वदेशी बजारमा पनि विदेशी कपडासँग प्रतिस्पर्धा गर्न कठिन भएको उनीहरुको भनाइ थियो।
