अर्थ मन्त्रालयले कर्मचारी आचारसंहिता २०७५ ल्याएको छ। मन्त्रालय र मातहत निकायका कर्मचारीलाई अनुशासित बनाउने भन्दै मन्त्रालयले आचारसंहिता जारी गरेको छ।
सदाचार, कर्तव्यपरायणलगायतका विषय तोकिएको आचार संहितामा कर्मचारीहरूलाई विभिन्न विषयमा सीमा तोकिएको छ।
निजामती सेवा ऐनले दिएको अधिकार प्रयोग गरी बनाइएको यो आचारसंहितालाई कार्यसम्पादन मूल्यांकनसँग जोडिने बताइएको छ।
आचारसंहिताकै सामाजिक सञ्जाल चलाउनेसम्बन्धी व्यवस्थामा कर्मचारीहरूले तोकिएको कार्यालय समयभित्र मोबाइल वा कम्प्युटरबाट व्यक्तिगत प्रायोजनका लागि सामाजिक सञ्जाल प्रायोग गर्न नहुने व्यवस्था गरिएको छ।
कार्यालय समयबाहेक चलाउँदा पनि कसैलाई आँच आउने गरी प्रतिक्रिया वा विचार प्रवाह गर्न नहुने बताइएको छ।
आचारसंहिताको पालना भए नभएको बारे सचिवलाई मन्त्रीले अनुगमन गर्ने छन् भने विभागीय प्रमुखलाई सचिव वा सचिवले तोकेको अधिकारीले अनुगमन गर्न व्यवस्था गरिएको छ।
