अर्थमन्त्री युवराज खतिवडाले बजेटबाहिर गएर पैसा खर्च गरे सरकार बदनाम हुने बताएका छन्। बुधबार प्रधानमन्त्री केपी शर्मा ओली पनि सहभागी एक कार्यक्रमा बोल्दै खतिवडाले विभिन्न मन्त्रालयबाट गैरबजेटरी रकम माग भइरहेको उल्लेख गरे। उनले मागअनुसार रकम दिए चरम आर्थिक अराजकता हुने बताए। चालु आर्थिक वर्षको ६ महिनाभित्रै एक खर्ब बढीको यस्तो माग आइसकेको र सबैलाई स्वीकृति दिंदै जाने हो सरकार बद्नाम हुने खतिवडाले बताए।
एकातिर खर्चको अवस्था सन्तोषजनक नहुने अर्कोतिर ठूलो मात्रामा गैरबजेटरी माग पनि बढ्दै जानुले गम्भीर आर्थिक अराजकता निम्त्याउने खतिवडाको तर्क छ।
‘अहिले गैरबजेटरी माग नै १ खर्बको आएको छ, जुन हामी दिन सक्दैनौं, दिन पनि हुँदैन। यो आर्थिक अनुशासनसँग जोडिएको कुरा हो’ खतिवडाले भने,‘सबै माग स्वीकृत गर्दै जाने हो भने हामी पनि बद्नाम हुन्छौं।’
अर्थले आवश्यक भए मन्त्रालयको नाममा विनियोजन भएको बजेटबाट अहिले काम चलाउन र पछि स्रोतबाट अपुग भएपछिमात्र अर्थ मन्त्रालयमा आउने व्यवस्था मिलाइसकेकोले स्रोतको अभावमा काम रोकिने अवस्था नभएको मन्त्री खतिवडाको भनाइ छ।
६ महिनामा वार्षिक लक्ष्यको ४४ प्रतिशत राजस्व उठाएको र खर्च भने २९ प्रतिशतमात्र भएकोले अघिल्ला वर्षकै निरन्तरता देखिएकोतर्फ खतिवडाले चिन्ता व्यक्त गरे।
‘अहिलेसम्मको खर्चको अवस्थाले हामी अर्को चौमासिकको पनि आँकलन गर्न सक्छौं जुन सकारात्मक देखिएको छैन’ उनले भने,‘अबको समय खर्चको रफ्तार बढाउन सकिएन भने फेरि असारमै गएर भुक्तानी हुने प्रवृत्ति रोकिने छैन।’