नेपाल आयल निगमका नवनियुक्त कार्यकारी निर्देशक सुरेन्द्रकुमार पौडेलले निगमको पुनर्संरचना गर्ने बताएका छन्।
कार्यकारी निर्देशक पौडेलले निगममा हुने गरेका बिकृति, बिसंगतिको अन्त्य गर्दै निगमका हरेक कारोबारलाई पारदर्शी बताउने प्रतिवद्धता जनाए।
बिहीबार निगमको ४९ औं वार्षिकोत्सवको अवसर पारेर काठमाडौंमा आयोजित एक कार्यक्रममा बोल्दै उनले निगमका गतिविधिलाई प्रभावकारी बनाउने योजना पनि अघि सारे। निगमको सुधारको लागि शुन्य सहनशीलताको नीतिलाई कडाईका साथ लागू गर्ने नवनियुक्त कार्यकारी निर्देशक पौडेलको भनाई छ।
नेपाल आयल निगमकाे ४९ औं वार्षिकोत्सवको अवसर पारेर काठमाडौंमा आयोजित एक कार्यक्रममा। तस्बिर: निशा भण्डारी/सेताेपाटी
निगमले राष्ट्र निर्माणको अभियानमा ठूलो योगदान गरेको उनको दावी छ। ‘गएको आर्थिक वर्षमा मात्रै निगमले ५५ अर्ब रुपैयाँ राजस्व तिरेको छ’ उनले भने ‘बुढिगण्डकी जलविद्युत आयोजनाका लागि २७ अर्ब रुपैयाँ संकलन भएको छ।’
निगमले अन्य क्षेत्रमा पनि लगानी गर्न ६ अर्ब रुपैयाँ व्यवस्था गरेको उनले स्पष्ट पारे।
