सरकारले चालु आर्थिक वर्षको पाँच महिनामा ३ खर्ब ४८ अर्ब राजस्व संकलन गरेको छ। साउदेखि मंसिर मसान्तसम्म साढे ३ खर्ब राजस्व उठाएको सरकारले मंसिरमा मात्र ९५ अर्ब संकलन गरेको छ।
खर्चमा कमजोर देखिएको सरकारले राजस्व भने सन्तोषजनक उठाउँदै आएको छ। यो बीचमा संघीय सरकारको खतामा सिधै आउने १ खर्ब ६८ अर्ब राजस्व संकलन भएको छ भने विभाज्य कोषमा जाने १ खर्ब ८० अर्ब संकलन भएको छ।
वर्षभर ९ खर्ब ४५ अर्ब राजस्व उठाउने लक्ष्य लिएको सरकारले पाँच महिनामा त्यसको ३६ प्रतिशत राजस्व उठाउन सफल भएको छ।
यो बीचमा खर्च भने निराशाजनक देखिएको छ। अघिल्ला वर्षकै जस्तो प्रवृत्तिमा खर्च हुँदा सरकारलाई चुनौति थपिएको छ। सरकारले यो बीचमा कूल विनियोजनको २३ प्रतिशतमात्र खर्च गरेको छ। यो वर्ष १३ खर्ब १५ अर्ब खर्च गर्नेगरी सरकारले बजेट ल्याएको छ।
यो बीचमा चालु तर्फको खर्च २ खर्ब ४८ अर्ब रहेको छ। जुन विनियोजनको २९ प्रतिशत हो। पुँजी निर्माण अथवा विकास खर्च भनेर चिनिने पुँजीगत खर्च भने यो बीचमा १२ प्रतिशतमात्र भएको छ।
ऋण तथा अनुदान, ब्याज तथा साँवा भुक्तानीमा खर्च गर्नेगरी विनियोजन भएको वित्तीय खर्च यो बीचमा १३ प्रतिशत भएको छ। मंसिर मसान्तसम्म सरकारी खाताचमा खर्च गर्न मिल्ने ३९ अर्ब ४१ करोड नगद जम्मा भएको छ।
