नेपालमा पछिल्लो समय वैदेशिक व्यापार घाटा बढ्दै गएको र यसको गति नरोकिए अर्थतन्त्रमा ठुलै धक्का जानसक्ने विश्लेषण भइरहेको बेला विश्वबैंकको नयाँ अध्ययनले भने केही सुधार गने नेपालले निर्यातलाई चार गुणा बढाउन सक्ने औल्याएको छ।
साउथ एसिया वाच अन ट्रेड, इकनोमिक्स एण्ड इन्भारमेन्टसँगको सहकार्यमा बैंकले प्रकाशित गरेको ‘अ ग्लास हाल्फ फुलः दि प्रमिस अफ रिजनल ट्रेड इन साउथ एसिया’ नामको प्रतिवेदनले अहिलेका केही कठिनाइहरु हटेमा दक्षिण एसिया क्षेत्रमा अहिलेको तुलनामा चार गुणा निर्यात बढाउन सक्ने उल्लेख गरिएको छ।
भन्सार र गैरभन्सारमा रहेका जटिलताहरु नेपालको व्यापारका बाधक रहेको उक्त रिपोर्टको निष्कर्ष रहेको छ। भन्सार दर, भन्सार क्लेरेन्स, प्रशासनिक प्रक्रिया, यातायात लागत, बोर्डर समस्याहरु तत्काल समाधान हुनुपर्ने उक्त अध्ययनको निचोड रहेको छ।
नेपालले गत वर्ष दक्षिण एसियामा २३ अर्ब मूल्यको वस्तु निर्यात गरेको थियो। व्यापारका बाधाहरु नेपालले हटाउन सकेमा यो बढेर ६७ अर्ब पुग्ने प्रक्षेपन रहेको छ। गत वर्ष नेपालले कूल ८० अर्ब रुपैयाँको निर्यात गरेको थियो।