नेपालमा पछिल्लो समय उत्पादनशील क्षेत्रकाे ऋणमा बढीरहेको ब्याजदर धातक हुनसक्ने अन्तर्राष्ट्रिय मुद्रा कोषले चेतावनी दिएको छ।
वार्षिक कार्यक्रमअनुसार आर्टिकल फोर एसिसमेन्ट गर्न आएको टोलीले नेपालको अर्थतन्त्रमा देखिएका केही कमजोरीहरुले निरन्तरता पाए सुखद भविष्य देखाउन नसक्ने ठहर गरेको छ।
अस्थिर, उच्च ब्याजदरले उत्पादकत्वमा असर गर्ने र त्यसले सोझै रोजगारी सिर्जना र शोधानन्तरसम्म धक्का दिने कोषको ठहर छ।
हालैका दिनमा नेपाली बैंकहरुले ब्याजदर धेरै बढाएपछि त्यसले पुँजीबजारसम्म असर गरेको भन्दै एकातिर पुँजीबजार लगानीकर्ता आन्दोलनरत छन् भने अर्कोतिर उद्योगी व्यवसायीहरु मागपत्र बुझाउँदै हिडिरहेका छन्।
सामन्य बजारको अभ्यास बाहिर गएर नेपाली बैंकहरुले ब्याज बढाएको भन्दै उद्योगीहरुले राष्ट्र बैंकदेखि अर्थमन्त्रालयसम्मको ध्यानाकर्षण गराईरहेका छन्।
ब्याज, पुँजी तथा मुद्रा बजारको समस्या समाधान गर्न भन्दै अर्थमन्त्रीले अध्ययन समिति बनाएका छन्। नेपाल राष्ट्र बैंकका डेपुटी गभर्नर शिराज श्रेष्ठको नेतृत्वमा गठित उक्त समितिले आइतबार अर्थमन्त्रीलाई प्रतिबेदन बुझाउने तयारी गरिरहेको छ।
मुद्रा कोषले भने उच्च आर्थिक बृद्धिको लक्ष्यले नै समस्या निम्त्याएको निष्कर्षमा पुगेको छ। निरन्तर बलियो बृद्धिदर कायम गरिरहेको अर्थतन्त्रमा एकैपटक जम्प गर्दा त्यसैले एकैपटक सबैतिर धक्का दिएको उसको अध्ययन निष्कर्ष छ।