लुम्बिनी आउने विदेशी पर्यटकलाई लक्षित गरी रुपन्देहीको सियारी गाउँपालिकामा २० करोड रुपैयाँ लगानीमा बहुउद्देश्यीय आयोजना निर्माण गरिने भएको छ।
गाउँपालिकाको वडा नं. ३ जंगहत्थामा रहेको ४ बिघा १० कठ्ठा क्षेत्रफलको ऐलानी जग्गामा बहुउद्देश्यीय आयोजना बनाउने गाउँ कार्यपालिका बैठकले निर्णय गरेको हो।
आयोजना अन्तर्गत विशाल बुद्ध स्तुप, सामुदायिक कृषि विकास केन्द्र, हरित पार्क, नैतिक शिक्षा तालिम केन्द्र लगायतका संरचना बन्ने छन्।
त्यस्तै, कम्पाउण्ड वाल र आकर्षक प्रवेशद्वार पनि बन्नेछन्। बहुउद्देश्यीय आयोजनाका लागि विश्व प्रकाश प्रतिष्ठान नामको गैरसरकारी संस्थाले ७५ प्रतिशत र सियारी गाउँपालिकाले २५ प्रतिशत लगानी साझेदारी गर्ने गरी सहमति भएको गाउँपालिकाका अध्यक्ष अयोध्या थारुले जानकारी दिए ।
बुद्ध जन्मस्थल लुम्बिनी र गौतमबुद्ध अन्तर्राष्ट्रिय विमानस्थल भैरहवाबाट नजिकै रहेकाले बहुउद्देश्यीय आयोजना बनेपछि लुम्बिनी आउने बौद्ध धर्मावलम्बी पर्यटकलाई आकर्षित गर्न सकिने गाउँपालिकाको विश्वास छ।
जंगहत्थामा रहेको खाली जग्गालाई पर्यटकीय स्थल बनाउन ४ वर्षअघि नै बुद्ध मन्दिर ल्याएर पूजाआजा गरिँदै आएको छ। विशाल बौद्ध स्तुप र नैतिक शिक्षा तालिम केन्द्रले बौद्धमार्गी पर्यटकलाई आकर्षित गर्नसक्ने अध्यक्ष थारुले दाबी गरे।
त्यस्तै, सियारी कृषि उत्पादनका लागि जिल्लाकै अग्रणी ठाउँ भएकाले सामुदायिक कृषि विकास केन्द्र स्थापनाले जिल्लाको मात्र नभई प्रदेशका सबै जिल्लाका कृषि क्षेत्रसँग सरोकार राख्नेका लागि गन्तव्य बन्न सक्ने उनले बताए। दानव र तिनाउ नदीको बीचमा रहेकोले कृषि र फलफूलमा धेरै सम्भावना रहेको उनले बताए ।
यो आयोजना छिट्टै कार्यान्वयनमा ल्याउन स्वीकृतिका लागि जिल्ला प्रशासन कार्यालय र प्रदेश ५ उद्योग, पर्यटन, वन तथा वातावरण मन्त्रालयमा पत्राचार गरिसकिएको गाउँपालिका उपाध्यक्ष अमृता गुरुङले बताइन् ।
गाउँपालिकाले पर्यटन प्रवर्द्धनलाई लक्षित गरी एक करोड बजेट विनियोजन गरेको छ । बहुउद्देश्यीय आयोजना सञ्चालनमा आएपछि करिब ५० जनाले प्रत्यक्ष रोजगारी पाउने उपाध्यक्ष गुरुङले बताइन् ।
गाउँपालिकाले युवाहरूलाई टुर गाइड र ड्राइभिङ तालिम दिई पर्यटक गाडी समेत किनेर दिने योजना बनाएको छ। गौतमबुद्ध अन्तर्राष्ट्रिय विमानस्थल सन् २०१९ भित्रै सञ्चालनमा आउन लागेकाले सियारी गाउँपालिकाले आन्तरिक तथा बाह्य पर्यटकलाई गाउँपालिकाका धार्मिक पर्यटकीय स्थल र कृषि हब अवलोकन गराउन टुर गाइड तालिम चलाउन थालेको हो ।