पन्ध्र महीनामा सक्ने भनिएको नेपालगञ्ज बसपार्कको निर्माण कार्य तीन वर्ष पुग्दा पनि सम्पन्न हुन सकेको छैन ।
पन्ध्र महीनाभित्र निर्माण सक्ने गरी नेपालगञ्ज उपमहानगरपालिका र युनाइटेड बिल्डर्स एण्ड इञ्जिनीयर्सबीच सन् २०१६ मार्चमा सम्झौता भएको थियो । निर्माण शुरु भएको अहिले तीन वर्ष बितिसक्दा झण्डै ५० प्रतिशत काम मात्र सम्पन्न भएको छ ।
ठेकेदार कम्पनीका कारण निर्माण कार्यमा ढिलाइ भएको नेपालगञ्ज उपमहानगरपालिकाले जनाएको छ तर बसपार्क क्षेत्रका स्थानीयले निर्माण कम्पनी, उपमहानगरपालिकाका पदाधिकारी र जनप्रतिनिधिको लापर्वाही र उदासीनताले निर्माणमा ढिलाइ भएको बताएका छन् ।
स्थानीयवासी केशव गिरीले बसपार्क निर्माणको क्रममा गुणस्तरहीन साम्रगी प्रयोग गरिएको, दैनिक काम नगरिएको भन्दै त्यसबारे उपमहानगरपालिकालाई जानकारी गराउँदा कुनै चासो नदिएको गुनासो पोखे।
नगर विकास कोषको ऋण सहयोगमा उपमहानगरपालिकाले १४ करोड ९४ लाख २९ रुपैयाँमा बस पार्क निर्माणको ठेक्का दिएको थियो । बसपार्कमा अहिले शौचालय, पानी र यात्रु बस्ने सुरक्षित ठाउँको अभाव छ । फोहर र धूलो चारैतिर उडेका छन्। बसपार्कमै किराना पसल गर्दै आएकी सविता चन्दले समयमै निर्माण नहुँदा सर्वसाधारणसहित आफूहरू दैनिक धूलोको शिकार हुनुपरेको आक्रोश पोखे।
उपमहानगरपालिले पछिल्लो समय आउँदो माघभित्र काम सक्ने गरी म्याद थपेको छ । सुस्त गतिमा काम भइरहेकाले माघभित्र पनि काम सकिनेमा स्थानीयवासी शङ्का व्यक्त गर्दछन् । नेपालगञ्ज उपमहानगरपालिका प्रमुख धवलशमशेर राणाले ठेकेदारले समयमा काम नगर्दा समस्या परेको बताउँछन्।
झण्डै १४३ बसलाई पार्किङ गर्नसक्ने क्षमताको टर्मिनल भवन निर्माण हुँदैछ । बसपार्कमा आधुनिक टिकट काउन्टर, तीन वटा पसलसहितको भवन निर्माण हुने गरी डिजाइन गरिएको छ । कन्सल्टेन्ट इञ्जिनीयर धनबहादुर भट्टराईले पछिल्लो पटक थपेको म्यादअनुसार निर्माणको काम सक्ने गरी काम भइरहेको बताए।
