अनुगमनका क्रममा जार पानीमा कैफियत भेटिएको ९ दिन हुँदा पनि प्रशोधन उद्योगलाई कारबाही नभएको भन्दै उपभोक्ताले गुनासो गरेका छन्।
खाद्य प्रविधि तथा गुण नियन्त्रण विभागले नै जारको पानीमा अनुगमन गर्दा फोहोर भएको प्रमाणित गरेको थियो। प्रमाणित गरे पनि उद्योगलाई कारबाही भने भएको छैन।
विभागले कात्तिक १९ मा शंखमूलस्थित अक्वाकिक नामक जारको पानी बेच्ने पसलमा अनुगमन गर्दा कैफियत भेटिएको थियो । उक्त कम्पनीको पानी उपभोग गर्दै आएका शंखमूलका उपभोक्ता नरेन्द्रबहादुर चन्दले पानीको जारमा किरा भेटेको जानकारी खाद्य तथा गुण नियन्त्रण विभागका महानिर्देशक सञ्जीव कर्णलाई दिएका थिए।
सोही गुनासोका आधारमा महानिर्देशक कर्णसहितको टोलीले चन्दको घर र पानी विक्रेता पसलमा गएर अनुगमन गरेको थियो। अनुगमनकै क्रममा शिल गरिएको अर्को जार पानीमा समेत फोहोर भेटिएको थियो।
चन्दका अनुसार महानिर्देशक कर्णसहित अनुगमन टोलीले फोहोर जारमा पानी भरेको निष्कर्ष निकाल्दै भोलिपल्ट नै उद्योगलाई कारबाही गर्ने प्रतिबद्धता जनाएको थियो।
‘अक्वाकिक जारको पानी फोहोर भएको परीक्षणले पनि देखाएको छ। उद्योगलाई भोलि नै कारबाही अगाडि बढाउँछौं भनेर हिँडेको खाद्य तथा गुण नियन्त्रण विभागको टोलीले कारवाहीमा तदारुकता देखाएन' उनले भने 'मैले अहिले पनि बजारमा उक्त कम्पनीको पानी देखिरहेको छु, थाहा नभएका उपभोक्ताले त्यही नामको पानी प्रयोग गरिरहेका छन्।’
कारबाही नभएकोबारे आफूले महानिर्देशक कर्णलाई पटक पटक जानकारी गराउन खोजेको पनि उनले बताए।
विभागका महानिर्देशक कर्णले भने अन्य ठाउँको अनुगमनमा व्यस्त हुनुपरेका कारण कारबाहीमा ढिलाइ भएको बताएका छन्।
उनले भने, ‘चाडबाडको बेला भएकाले हामीले मिठाई अनुगमनलाई तिब्रता दियौं, त्यसैले त्यता ध्यान दिन नसकेका हौं। पानीमा कैफियत भेटेको सातौं दिन हाम्रो टोली उद्योगमा पुगेको थियो। उद्योगमा ट्रान्समिटर पड्केकाले कम्पनी केही दिनका लागि बन्द गरिएको नोटिस टाँसेको रहेछ। कम्पनी खुल्नासाथ कारवाही अगाडि बढाउँछौँ ।’ महानिर्देशक कर्णले उद्योगमा ताला लागेको बताए पनि अक्वाकिकको पानी भने बजारमा पाइन्छ।
विभागको ढिलाइलाई उपभोक्ता अधिकारकर्मी लाचारीको संज्ञा दिन्छन्। ‘खाद्यवस्तुमा कैफियत भेटिँदा पनि कारबाही नगरेर पन्छिन खोज्नु विभागको लाचारी हो, यो निन्दनीय छ’ उपभोक्ता हित तथा संरक्षण मञ्चका अध्यक्ष प्रेमलाल महर्जनले भने, ‘कुनै पनि खाद्यवस्तुमा कैफियत भेटिएपछि त्यो कम्पनीलाई विभागले तुरुन्त कारवाही अगाडि बढाउनुपर्छ।’
प्रमाण भेटेको यतिका दिनसम्म पनि दोषीलाई कुनै कारवाही नहुनुले विभागको नियतमा नै शंका उब्जिएको उनले बताए। यस्तो ढिलासुस्तिले अपराधी उम्किने मौका पाउने उनको भनाइ छ।
