सरकारले समयमै चालू आर्थिक वर्षको बजेट सार्वजनिक गरेको भए पनि पूँजीगत खर्चमा उत्साहजनक वृद्धि हुन नसकेको पाइएको छ ।
सरकारले सार्वजनिक गरेको चालू आव सुरु भए यता सोमबारसम्मको राजस्वको लक्ष्य र खर्चको विवरणअनुसार पूँजीगत खर्च लक्ष्यअनुसार बढ्न नसकेको हो ।
चालू आवको तीन महिना सकिँदा ७ दशमलव २० प्रतिशत मात्रै पूँजीगत खर्च हुन सकेको छ । चाडबाड तथा ठेक्का प्रक्रियामा समय लागेका कारण पनि खर्चमा सोचेअनुसारको प्रगति हुन नसकेको हो ।
सरकारले गत जेठ १५ गते चालू आवको बजेट प्रस्तुत गरेको थियो। खर्चको अख्तियारीसमेत समयमै दिएको थियो । तर यस अवधिमा विकास निर्माणको कामले भने सोचेअनुसार प्रगति हुन सकेको छैन ।
यस्तै सोमबारसम्म सरकारले रु दुई खर्ब ३१ अर्ब ३८ करोड बराबरको राजस्व सङ्कलन गरेको छ । सरकारले चालू आवमा रु नौ खर्ब ४५ अर्ब ५६ करोड राजस्व उठाउने लक्ष्य राखेको छ । कूल लक्ष्यको २४ दशमलव ५२ प्रतिशतले राजस्व सङ्कलन भएको छ।