नेपाल कम्युनिष्ट पार्टीका नेता तथा पूर्व प्रधानमन्त्री माधव कुमार नेपालले मन्त्री र प्रशासकीय प्रमुखलाई आउने कमिशनकै लागि जथाभावी पूर्वाधार बनाउन नहुने बताएका छन्।
प्रतिनिधि सभाको अन्तर्राष्ट्रिय सम्बन्ध समितिले निजगढ अन्तर्राष्ट्रिय विमानस्थल आयोजनाको बारेमा अध्ययन गर्न गठित उपसमितिको बैठकमा बोल्दै नेपालले आवश्यकता भन्दा लहडको भरमा कतिपय पूर्वाधार निर्माण भइरहेको बताएका हुन्।
नेपाल संयोजकत्वको उक्त समितिमा बोल्दै नेपालले निजगढ विमानस्थल अपरिहार्य रहेको र त्यो विमानस्थल सम्पन्न भएपछि काठमाडौं विमानस्थल आफैं आन्तरिक उडानमात्र हुने भएकोले यो पाँच वर्षका लागि काभ्रेमा विमानस्थल बनाउन नहुने बताए।
‘मन्त्री आए पिच्छे विमानस्थल बनाउन भएन त्यस्ता आयोजना अघि बढाउन पनि हुँदैन, अध्ययन भन्यो के भन्यो अनि कमिशन खायो तर बनाउने होइन’उनले भने,‘बनाउनैपर्ने निजगढको अहिलेसम्म अध्ययनमात्र भइरहेको छ तर बन्नै नपर्ने काभ्रेमा भने प्रत्येक पटक मन्त्री फेरिँदा अध्ययन सुरू हुन्छ।’
