संघीय संसदको विकास तथा प्रविधि समितिले दसैँको अग्रिम टिकट सहज रूपमा उपलब्ध गराउने व्यवस्था गर्न सरकारलाई निर्देशन दिएको छ।
समितिको बुधबार सिंहदरबारमा बसेको बैठकले सर्वसाधारणलाई दसैँको अग्रिम टिकट सहज रूपमा पाउने व्यवस्था गर्न भौतिक पूर्वाधार तथा यातायात मन्त्रालयलाई निर्देशन दिएको हो।
दसैँको अग्रिम टिकट बुकिङ सहज नभएको सर्वसाधारणले गुनासो गरेपछि त्यसलाई तत्काल सहज बनाउन सरकारलाई सचेत गराइएको समितिका सभापति कल्याणी खड्काले जानकारी दिइन्।
तोकिएको मूल्यभन्दा बढीमा टिकट विक्री गरे त्यस्ता व्यवसायीमाथि कडा कारबाही गर्न पनि समितिले सरकारलाई सचेत गराएको छ।
समितिले सडक सुरक्षाको उचित व्यवस्था गर्न पनि सरकारलाई भनेको छ। चाडवाडका बेला नागरिकको सुरक्षालाई ध्यानमा राखेर क्षमताभन्दा बढी यात्रु नराख्न पनि सरकारलाई सचेत गराइएको सभापति खड्काले बताइन्। समितिले सडक सुरक्षालाई ध्यानमा राखेर देशभर ट्राफिक प्रहरी परिचालन गर्न पनि सरकारालाई निर्देश गरेको छ।
समितिले चाडपर्वका बेला भएकाले यात्रुको सुरक्षालाई ध्यानमा राखेर लामो दूरीका सवारी साधनमा २ वटा चालकको व्यवस्था गर्न पनि सरकारको गम्भीर ध्यानाकर्षण गराएको छ।
त्यसैगरी पुराना सवारी साधन चलाउन नदिन कडा निगरानी राख्न पनि समितिले सरकारलाई सचेत गराएको छ ।
