जर्मनीले नेपाल सरकारलाई अगमी दुई वर्षमा ७ अर्ब ५० करोड रुपैयाँ सहयोग गर्ने भएको छ।
बर्लिनमा भएको नेपाल जर्मन विकास सहायता सम्बन्धी वार्तामा जर्मनले आगामी दुई वर्षमा वित्तीय तथा प्राविधिक सहायता गरी यूरो ५५.६ मिलियन (करीब ७ अर्ब ५० करोड नेपाली रुपैया)बराबर अनुदान सहायताको प्रतिवद्धता गरेको अर्थ मन्त्रालयले जानकारी दिएको छ।
त्यस्तै उर्जा दक्षता कार्यक्रम अन्तर्गत लेखनाथ दमौली २२० केभी प्रसारण लाईन परियोजना निर्माणका लागि थप १५ मिलियन यूरो सहित जम्मा ३१ मिलियन यूरो अनुदान सहायता प्रदान गर्ने संझौतामा हस्ताक्षर भएको अर्थ मन्त्रालयले जानकारी दिएको छ।
उक्त संझौतामा नेपालको तर्फबाट अर्थ मन्त्रालयका सहसचिव श्रीकृष्ण नेपाल र जर्मनी सरकारको तर्फबाट केएफ डब्लु विकास बैंकको दक्षिण एसिया क्षेत्रीय व्यवस्थापक एसमिन त्वाफिकले हस्ताक्षर गरेकी छन्।
उक्त वार्तामा जर्मनी सरकारबाट उर्जा, स्वास्थ्य तथा दीगो आर्थिक विकासका क्षेत्रमा जारी आयोजनाहरुलाई निरन्तरता दिंदै थप आयोजनाको लागि समेत प्रतिवद्धता प्राप्त भएको अर्थ मन्त्रालयले जानकारी दिएको छ।
