भारतीय नीति आयोगको उपाध्यक्ष डा राजिव कुमारले मोदी सरकारले पछिल्लो चार वर्षमा आर्थिक क्षेत्रमा ठुलो फड्को मारेको बताएका छन्। काठमाडौंमा आयोजित कार्यक्रममा बोल्दै कुमारले भारतको इतिहासमा पछिल्लो चार वर्ष आर्थिक क्षेत्रका लागि कोषे ढुंगा भएको बताए।
राजनीतिक र सामाजिक परिवर्तनमै अल्झिएको राजनीतिक व्यवस्थामा एकाएक आर्थिक सुधारका कामहरु आफूहरुले गरेको र त्यसको परिणाम अहिले देखिन थालेको उनले जानकारी दिए। गएको वर्ष ८.२ प्रतिशतको आर्थिक बृद्धि हासिल गरेको र अझै ठुलो बृद्धिदरको लक्ष्य राखिएको उनले जानकारी दिए। सरकारले बृद्धि र विकासका सन्दर्भमा लिएका धेरै लक्ष्य पुरा हुने उनको विश्वास छ।
आर्थिक नीतिमा भएका परिवर्तनबाट देशमा लगानीको वावावरण बनेको देशभर पूर्वाधार निर्माणको काम धमाधम भइरहेको र यो विकास र परिवर्तन सरकारले भन्दा अन्तर्राष्ट्रिय संस्थाको रेटिङमा पनि देखिएको उनले प्रष्ट पारे।
इन्टिग्रेटेड डेभलेपमेन्ट स्टडिज, काठमाडौं विश्वविद्यालय र बारबरा फाउन्डेशनको आयोजनामा काठमाडौंमा सम्पन्न कार्यक्रममा प्रमुख वक्ताको रुपमा आएका कुमारले भारतको विकास र समृद्धिबाट सिंगो दक्षिण एसियाले लाभ लिन सक्ने बताए।
दुई देशबीचका सम्बन्ध पहिलेजस्तो राजनीतिक र सामरिकमात्र भन्दा पनि अहिले आर्थिक कारणले निर्धारण हुने उनको भनाइ छ। राजनीतिकले तोड्ने सम्बन्धलाई अर्थतन्त्र र व्यापारले जोड्ने उनले बताए।
यसरी सम्बन्ध जोड्नको लागि नेपाल र भारतबीच थुप्रै आर्थिक गतिविधि भइरहेको उनले जानकारी दिए।
‘पहिले यस्ता आर्थिक सहयोगका काम डकुमेन्टमा मात्र हुन्थे तर अहिले वास्तविकरुपमा भइरहेका छन्’ उनले भने,‘अरुण तेस्रो र माथिल्लो कर्णाली निर्माण हुने क्रममा छन्, रक्सौल बाट काठमाडौं जोड्ने रेलको डिपिआर बन्ने क्रममा गएको छ थुप्रै पुर्वाधार काम अहिले भइरहेका छन्।’
त्यस्तै भारतले ल्याएको उडान ३ कार्यक्रमबाट पनि नेपालले लाभ लिनसक्ने उनले जानकारी दिए। भारत सरकारले नागरिकलाई सस्तो र सुलभ हवाई यात्राको लागि ल्याएको उक्त स्किमलाई नेपालका केही विमानस्थलसम्म विस्तार गर्न सकिने उनको आसय थियो।
कुमारले नेपालमा रहेका भारु ५ सय र एक हजारका नोट सटहीको लागि आफूले प्रस्ताव लिने प्रतिबद्धता पनि जनाएका छन्।
