राजधानी प्रवेशको मुख्य नाका कलंकीमा हुने जाम घटाउन भन्दै निर्माण सुरु गरिएको ‘क्रस रोड’ निर्माण सम्पन्न भएको छ। जमिनमाथि र मुनीबाट सवारी चल्ने उक्त सडकको निर्माण कार्य सबै सकिएको सडक विभागका महानिर्देशक रविन्द्रनाथ श्रेष्ठले जानकारी दिए।
यद्यपी उक्त सडकको उद्घाटन हुन बाँकी छ।
चीन सरकारको सहयोगमा निर्माण भएकाे सडक आजैदेखि उद्घाटन गर्ने लक्ष्य सडक विभागकाे थियो। तर, ठेकेदार कम्पनीले नेपालस्थित चिनियाँ राजदूतावासको निर्देशन चाहेपछि केही दिन लाग्ने भएको छ।
दूतावासले उक्त सडक हस्तान्तरण र उद्घाटनको लागि औपचारिक पत्र चाहेको र आफूहरुले पत्र पठाइसकेको श्रेष्ठले जानकारी दिए।
‘सम्भवतः २/३ दिनमा हस्तान्तरण र उद्घाटन हुन्छ होला’, श्रेष्ठले सेतोपाटीसँग भने।
चीन सरकारको सहयोगमा कलंकी चोकमा बन्न लागेको ‘क्रस रोड’को काम २०७४ को पुसभित्र सक्ने लक्ष्य रहे पनि भूकम्प र भारतीय नाकाबन्दीको कारण लम्बिएको अधिकारीहरुले बताउँदै आएका छन्।
यो अन्डरपाससहितको सडकले पृथ्वी राजमार्गसँग अरनिको राजमार्ग जोड्नेछ। कालीमाटीतर्फबाट थानकोटतिर जाने सडक समानान्तर उचाइमा रहन्छ भने बल्खुबाट सितापाइला जाने सडक चोकबाट चार सय मिटर दक्षिणदेखि चार सय मिटर परसम्म अन्डरपास बन्नेछ। चारैतिरबाट देब्रेतर्फ मोडिने ठाउँमा दुई लेनको फराकिलो सडक यथावत् रहनेछ ।
अन्डरपास सडक जाने र आउने दुईदुई गरी चार लेनको हुनेछ । कलंकी चोकबाट बल्खु जानेतर्फ टिनले घेरिएको ठाउँमा चार सय वटा बोर्ड पाइल गर्ने काम भइरहेको छ।
चोकमा ‘क्रस रोड’ बनाउने काम कोटेश्वरदेखि कलंकीसम्मको १०.३९५ किलोमिटर सडक आठ लेनको बनाउने आयोजनाभित्रै परेको छ। आयोजना २०७० भदौदेखि सुरू गरिएको हो।
बल्खुबाट थानकोटतर्फ लाग्दा मोडिने ठाउँ (देब्रेपट्टि) रहेका रिटेनिङ वाल कमजोर रहेको ठहर गर्दै चिनियाँ कम्पनीले तलैबाट जग हालेर एक सय ३० मिटर लामो बनाएको छ।
त्यसपछि बल्खुबाट थानकोट मोडिने र विपरीत दिशाबाट बल्खु जाने सवारीसाधनले पनि सोही सडक प्रयोग गर्नेछन्। चीन सरकारको झन्डै पाँच अर्ब रुपैयाँ खर्चिएर आयोजना सम्पन्न भएको हो।
