गएको वर्ष सरकारले १० खर्ब ७३ अर्ब २३ करोड ६७ लाख ७ हजार रुपैयाँ खर्च गरेको छ। जनताले तिरेको कर तथा विभिन्न स्रोतबाट हुने त्यस्तो खर्च कुन क्षेत्रमा कति भयो?
नेपाल सरकारको खर्च तथा आयको विवरण राख्ने महालेखा नियन्त्रकको कार्यालयले प्रकाशन गरेको प्रारम्भिक विवरणअनुसार सरकारले गत वर्ष कर्मचारीको तलब भत्ता तथा दैनिक प्रशासन संचालनमा सबैभन्दा बढी खर्च गरेको छ। सामन्य प्रशासन तथा सार्वजनिक सेवा शिर्षकमा ४ खर्ब ४ अर्ब रुपैयाँ खर्च भएको छ।
त्यस्तै नेपाली सेना तथा रक्षा सेवातर्फ सरकारले ४८ अर्ब रुपैयाँ खर्च गरेको छ भने शान्ति सुरक्षाको नाममा ५३ अर्ब भएको छ।
आर्थिक विकासको क्षेत्रमा सरकारले ३ खर्ब ७८ अर्ब रुपैयाँ खर्च गरेको छ भने सामुदायिक सुविधा शिर्षकमा ४९ अर्ब खर्चिएको छ। त्यस्तै वातावरण संरक्षणमा सरकारले गत वर्ष १३ अर्ब खर्च गरेको छ।
स्वास्थ्य सेवामा ३५ अर्ब खर्च गरेको सरकारले शिक्षामा भने ४४ अर्ब खर्चिएको छ। त्यस्तै सामाजिक सुरक्षामा सरकारले ३९ अर्ब खर्च गरेको छ।
सरकारले गत वर्ष ७ खर्ब २६ अर्ब राजश्व उठाएको छ। त्यस्तै १ खर्ब ५२ अर्ब आन्तरिक ऋण उठाएको सरकारले ८० अर्ब वैदेशिक ऋण र ३२ अर्ब वैदेशिक अनुदान पाएको छ।
