ऊर्जा, जलस्रोत तथा सिँचाइ मन्त्रालयले कर्मचारी सरुवा र खटनपटनका लागि मापदण्ड बनाएर मात्र प्रक्रिया अघि बढाउन मातहतका निकायलाई निर्देशन दिएको छ ।
ऊर्जा, जलस्रोत तथा सिँचाइ मन्त्री वर्षमान पुनले मन्त्रालयका सचिव र मातहतका विभागका प्रमुखलाई सरुवाको मापदण्ड बनाउन र मनलाग्दी तवरले कुनै पनि निकायका कर्मचारीको सरुवा नगर्न निर्देशन दिएका हुन्।
मन्त्री पुनले सरुवामा मापदण्ड बनाएर लागू गर्न, योग्य व्यक्तिलाई उचित जिम्मेवारी दिन तथा सही व्यक्ति सही पदको नीति लागू गर्नसमेत सम्बद्ध निकायलाई निर्देशन दिएका छन्।
मन्त्री पुनले आज मन्त्रालय मातहतका सबै प्रमुख तथा पदाधिकारीलाई बोलाएर उक्त निर्देशन दिएको उनको सचिवालयले जनाएको छ ।
‘मापदण्ड तयार भएपछि पूर्वअनुमानयोग्य हुन्छ । वस्तुपरक आधार पनि बन्छन्। कर्मचारीले पनि समान अवसर पाउने वातावरण निर्माण हुन्छ’ उनले भने।
मन्त्री पुनले भनसुनका आधारमा काम गर्नेभन्दा पनि प्रणालीले काम गर्ने खालको वातावरण बनाउन तथा अनुचित लाभ र दबाब दिने काम जो कोहीले गरे पनि आफूलाई जानकारी गराउन र त्यस्तो कार्य गर्नेलाई कानूनअनुसार कारबाही गर्न निर्देशन दिएका छन्।
मापदण्ड बनाएर गर्ने सरुवाले कर्मचारीलाई पनि थप उत्प्रेरित गर्ने र सबै कर्मचारीको क्षमताको वृद्धि विकासमा समेत सहयोग पुग्ने मन्त्री पुनको भनाइ छ ।
