भारतले नेपालको नारायणी र कोसी नदीमा जलमार्ग सञ्चालनका लागि स्थलगत अध्ययन गर्ने भएको छ।
नेपाल र भारतका सहसचिवस्तरमा भएको वार्तामा भारतीय पक्षले नेपालको कोसी र नारायणी नदीमा जलमार्ग सञ्चालन गर्न सम्भव रहेको जनाएसँगै भारतले स्थलगत अध्ययन गर्ने भएको हो ।
भारतीय अन्तरदेशीय जलमार्ग प्राधिकरणका उपाध्यक्ष प्रविर पाण्डे नेतृत्वको टोलीले नारायण नदीमा जलमार्ग सञ्चालन सम्भव रहेको नेपाली टोलीलाई बताएको हो।
'भारतीय पक्षको विशेषज्ञ सम्मिलित प्राविधिक टोलीबाट नेपालतर्फ कोसी तथा नारायणी नदीमा जल यातायातको स्थलगत अध्ययन गरी दुवै पक्षबीच छलफल गर्ने सहमति भएको छ', जल तथा उर्जा आयोगको सचिवालयले जारी गरेको विज्ञप्तिमा भनिएको छ।
प्रधानमन्त्री केपी ओलीको भारत भ्रमणका क्रममा जारी संयुक्त वक्तव्यमा उल्लेखित 'इनल्याण्ड वाटरवे कनेक्टिभिटि' सम्बन्धमा छलफल गर्न भारतीय टोली नेपाल आएको हो।
छलफलमा भारतले कलकत्ताबाट वाराणसीसम्मको १४०० कि.मी. लम्बाईमा भइरहेको जल यातायातसम्बन्धी गतिविधिको विषयमा प्रस्तुति दिएको थियो। त्यस्तै गण्डक (एनडब्लु-३७) र (नेपालका नारायणी) तथा कोसी नदी (एनडब्लु-५८) मा जल यातायातको सम्भावनाबारे कार्यपत्र प्रस्तुत गरेको थियो।
'नेपालमा जल यातायात नारायणी र कोसीमार्फत् गंगा नद सँगै जोडिदै भारतको हल्दिया हुँदै बंगलादेश र अन्य मुलुहरूसँग जोडिने प्रचुर संभावना रहेको र यसबाट उल्लेखनीय आर्थिक विकासमा सहयोग पुग्ने कुरामा दुवै पक्ष सहमत देखिए', वार्तापछि जारी सचिवालयले जारी गरेको विज्ञप्तिमा भनिएको छ।
वार्तामा दुवै पक्षले आ-आफ्नो प्रावधिक टोली गठन गर्ने र एनडब्लु-१ (गंगा नदी) को कोलकता हल्दिया - वाराणसी जलमार्ग खण्डको अध्ययन गर्ने तथा नेपाल तर्फ कोसी तथा नारायणी नदीमा जल यातायातको स्थलगत अध्ययन गर्ने सहमति गरेका छन्।
वार्ताका क्रममा नेपाल तथा भारतबीच निर्माण विधि र मोडालिटी सम्बन्धमा छलफल भएको थियो। भारतले नेपाललाई आवश्यक पर्ने जनशक्तिलाई तालिम तथा संस्थागत क्षमता अभिवृद्धि गर्न सहयोग गर्ने जनाएको छ।