संविधानकाे व्यवस्थाअनुसार प्रत्येक स्थानीय तहले असार १० गते आगामी वर्षको आय व्ययको विवरण(बजेट) ल्याउनुपर्ने भएपनि ललितपुर महानगर बाहेकका चारले आज बजेट ल्याएका छन्।
आज सार्वजनिक बजेटमा सबैभन्दा बढी काठमाडौं महानगरको रहेको छ। काठमाडौंले आगामी वर्षका लागि १३ अर्ब २ करोड रुपैयाँको बजेट ल्याएको छ। काठमाडौंले आन्तरिक स्रोतबाट ४ अर्ब ९० करोड २१ लाख ५७ हजार, बाह्य स्रोतबाट ५ अर्ब १९ करोड र अन्य स्रोतबाट १ अर्ब ४ करोड ११ लाख आय हुने अनुमान गरेको छ।
त्यस्ते पोखरा महानगरले ६ अर्ब ५३ करोडको बजेट ल्याएको छ। पोखराले १ अर्ब ६९ करोड रुपैयाँ आन्तरिक आयबाट प्राप्त हुने बाँकी अनुदान र ऋणबाट जुटाउने प्रक्षेपन गरेको छ।
वीरगन्ज महानगरपालिकाले ४ अर्ब ९४ करोड ३१ लाख ७७ हजारको अनुमानित बजेट प्रस्तुत गरेको छ । विरगंजले आगामी आवका लागि चालूतर्फ १ अर्ब ४४ करोड ७९ लाख ९ हजार, पूँजीगत खर्चतर्फ ३ अर्ब ५१ करोड ४३ लाख ८५ हजार र वित्तीय व्यवस्थापनतर्फ १ करोड ५८ लाख ८३ हजार बजेट विनियोजन गरेको छ।
विराटनगर महानगरपालिकाले आगामी आर्थिक वर्ष २०७५÷७६ का लागि ४ अर्ब ४७ करोड आठ लाख ४९ हजार बजेट आज सार्वजनिक गरेको छ । महानगरले आन्तरिक स्रोतबाट ५४ करोड ३ लाख, राजश्व बाँडफाटबाट ३७ करोड पाँच लाख, संघीय र प्रदेश सरकार वित्तीय समानीकरण अनुदानबाट ५३ करोड ८७ लाख, विषयगत कार्यालय ४४ करोड ९६ लाख, संघीय सरकार समपूरक र विशेष अनुदानबाट १० करोड, संघीय सरकार सर्त अनुदान ३६ करोड १५ लाख, वैदेशिक र अन्य संघसस्था अनुदान चार करोड ४६ लाख ५० हजार, जनसहभागिताबाट तीन करोड ५० लाख, नगर विकास कोष ऋण सहयोग एक करोड ८० लाख, मौज्दात सात करोडसहित जम्मा दुई अर्ब ५२ करोड ८३ लाख ४९ हजार आय हुने अनुमान गरेको छ।
त्यस्तै भरतपुर महानगरले ३ अर्ब ३४ करोड ५ लाखको बजेट ल्याएको छ।