काठमाडौं महानगरपालिकाले आगामी आर्थिक वर्षका लागि १३ अर्ब २ करोड १३ रुपैयाँको बजेट ल्याएको छ। महानगरले आज ल्याएको आयाव्ययको विवरणमा आर्थिक वर्ष २०७५÷०७६ मा ४ अर्ब ९० करोड आन्तरिक स्राेत र बाँकी ऋण तथा अनुदानबाट बेहोर्नेगरी उक्त बजेट सार्वजनिक गरेको छ।
संविधानको व्यवस्थाअनुसार असार १० गते ल्याउनुपर्ने बजेट आज देशभरका स्थानीय तहले ल्याएका छन्।
काठमाडौं महानगरले आगामी वर्ष पूर्वाधार तथा विकासमा ७ अर्ब ६५ करोड रुपैयाँ खर्च गर्ने योजना बनाएको छ। त्यस्तै कार्यालय संचालन ६२ करोड ३१ लाख खर्च गर्ने प्रस्ताव रहेको छ।
महानगरले आगामी वर्ष १ अर्ब ३० करोड रुपैयाँ तलब भत्तामा खर्च हुने प्रक्षेपन गरेको छ भने पुँजी निर्माणमा २ अर्ब ३६ करोड रुपैयाँ खर्च गर्ने महानगरको प्रस्ताव छ।
