७५ मेगावाट क्षमताको त्रिशुली गल्छी आयोजना इपिसिएफ मोडलमा निर्माण हुने भएको छ।
सिद्धकाली पावर कम्पनी र दोंगफांग इलेक्ट्रिक इनटरनेशनल कर्पोरेसनबीच सो आयोजना इन्जिनियरिङ, प्रोस्युरमेन्ट, कन्स्ट्रक्सन एण्ड फाइनान्स (इपिसिएफ) मोडलमा निर्माण गर्ने सम्झौता भएको हो।
बेइजिङस्थित नेपाल दुताबासमा प्रधनमन्त्री के.पि शर्मा ओलीको उपस्थितिमा सिद्घकालीका तर्फबाट कम्पनी अध्यक्ष गुरु प्रसाद न्यौपाने र दोंगफांगका तर्फबाट उपाध्यक्ष चेन च्यानले संयुक्त रुपमा सम्झौतामा हस्ताक्षर गरे।
यो विधिअनुसार बित्तीय श्रोत समेत चिनियाँ कम्पनीहरुले जुटाएर आयोजना निर्माण भई हस्तान्तरण हुनेछ। चिनियाँ कम्पनीको उक्त लगानी आयोजना निर्माण भई संचालनमा आएको १ बर्ष पश्चात चुक्ता गर्ने जिम्मेवारी सिद्घकाली पावर कम्पनीको रहनेछ।
आयोजनाको बाँधस्थल नुवाकोट जिल्लाको रातमाटेमा र आयोजनाको विद्युतगृह धादिंग जिल्लाको मास्टारमा रहनेछ। आयोजनाको निर्माण कार्य यो सम्झौताअघिनै शुरु गरिएको र सम्झौता भए पश्चात चिनियाँ लगानी एवं प्रविधिबाट सम्पन्न हुनेछ। स्वदेशी लगानीको जिम्मेवारी आयोजनाको अगुवा लक्ष्मी बैंकले लिएको छ।
आयोजनामा सिभिलको कार्य चीनको बहुचर्चित चाइना रेलवे ब्यूरो २ ले गर्ने र विद्युतीय कार्य दोंगफांग इलेक्ट्रिक इनटरनेशनलले गर्नेछ।
आयोजनाको निर्माण कार्य आगामी असोजदेखि सुरु भई साढे ३ वर्षमा सम्पन्न गर्ने लक्ष्य लिइएको छ। लामो अनुभव भएका कम्पनीहरुले आयोजना निर्माण गर्ने भएकोले आयोजनामा रहेको ८ किलोमिटर सूरुंग निर्माणमा कुनै समस्या र चुनौति नहुने चिनियाँ कम्पनीहरुको दावी छ।
चाइना रेलवे ब्यूरो २ ले भेरि बबई आयोजनामा टि.बि.एमको प्रयोग गरी उच्च गतिमा कार्य गरिरहको छ। कम्पनीले निकट भविष्यमा नै स्थानीय र सर्वसाधरणलाई शेयर जारी गर्नेछ।
सिद्धकाली पावर कम्पनीमा अपि पावरले १ बराबर २ को हकप्रद जारी गरी १.१३ अर्ब लगानी गर्नेछ सो हकप्रदको कार्य यो सम्मmौता पश्चात टुङगिने कम्पनीले जनाएको छ।