हिमालयन बैंकले सञ्चालन गरेको ई–कमर्स पेमेण्ट गेटवेको मद्धतले बुद्ध एयरका कुनै पनि गन्तव्यका टिकट सजिलै खरिद गर्न पाइने भएको छ। बिना कुनै झञ्झट, घर, कार्यालयमै बसेर केही क्लिकका भरमा यात्रुले बुद्ध एयरको आधिकारिक वेवसाइटबाट टिकट किन्न सक्नेछन्।
यसअघि यो सुविधा विदेशी यात्रुलाई मात्रै थियो भने अबदेखि नेपाली यात्रुका लागि पनि सेवा खुला गरिएको बुद्ध एयरले जनाएको छ।
भिसा तथा मास्टरकार्डको मद्दतले नेपालीसँगै भारतीयले पनि टिकट खरिद गर्न सक्नेछन्। नेपाली, भारतीय, शरणार्थी तथा लामो समयसम्म नेपालमै बस्ने यात्रुले पनि नेपाली रूपैयाँमै टिकट खरिद गर्न सक्ने कम्पनीले जनाएको छ।
अन्यले भने अमेरीकी डलरमा खरिद गर्नुपर्ने हुन्छ। यसरी टिकट खरिद गर्दा यात्रुले कुनै अतिरिक्त शुल्क तिर्नुपर्ने नपर्ने कम्पनीले बताएको छ।
बुद्ध एयरको मोवाइल एपबाट उडान तालिका तथा सस्तो भाडादरबारे पनि जानकारी लिन सकिने कम्पनीले जनाएको छ।
बुद्ध एयरले २ बीच एयरक्राफ्ट तथा ७ एटिआर जहाजबाट मुलुकभर हवाई सेवा उपलब्ध गराउँदै आएको छ। देश बाहिर भारतको वाराणशी नियमित र भुटानको पारो चार्टड उडान गरिरहेको छ।
आउँदो अक्टोवरमा यसले सेवा सञ्चालनको २ दशक पुरा गर्दैछ। बुद्ध एयरले गत वर्ष मात्रै १२ लाख यात्रुलाई हवाई सेवा प्रदान गरेको थियो।