दक्षिण कोरियाको विश्वविख्यात स्मार्टफोन निर्माता कम्पनी सामसुङले बुधबार फोल्ड गर्न मिल्ने नयाँ स्मार्टफोन सार्वजनिक गरेको छ। विश्वमै फोल्ड गर्न मिल्ने मोबाइल निर्माण गर्ने सामसुङ पहिलो कम्पनी पनि भएको छ।
तीव्र प्रतिस्पर्धाका कारण मोबाइलको विक्री घट्न थालेपछि चिन्तित देखिएको सामसुङले नयाँ विशेषतासहितको नयाँ फोन सार्वजनिक गरेको हो। यस फोनमा पाँचौं पुस्ता (फाइभ–जी) को तारविहीन टेलिफोन नेटवर्कमा समेत काम गर्नेछ।
सामान्य स्मार्टफोन र ट्याबलेट दुबै स्वरूपमा विकास गरिएको नयाँ स्मार्टफोनमा कृत्रिम बौद्धिकता (आर्टिफिसियल इन्टेलिजेन्स) र अरु विशेषता थप गरिएको छ।
अमेरिकाको सानफ्रान्सिस्कोमा सार्वजनिक गरिएको यस फोनको नाम ग्यालेक्सी फोल्ड राखिएको छ। एउटै डिभाइसमा ४.६ इन्चको स्मार्टफोन र ७.३ इन्चको ट्याबलेट रहेको छ।
यो स्मार्टफोन अप्रिल २६ तारिखबाट बजारमा आउनेछ। यसको मूल्य अमेरिकामा एक हजार ९८० अमेरिकी डलर (२ लाख २५ हजार ७ सय २० रुपैयाँ) रहेको कम्पनीले जनाएको छ।
कम्पनीका जस्टिन डेनिसनले नयाँ उपकरणमा तीनवटा एप्स एकैसाथ चलाउन मिल्ने जानकारी दिए।
‘तपाईंले एकै समय युट्युबमा भिडियो हेर्न, यसका बारेमा साथीसँग अन्तक्र्रिया गर्न तथा यात्राका लागि नयाँ गन्तव्यको खोजी गर्न सक्नुहुन्छ,’ उनले भने।
सोही समारोहमा सामसुङले ग्यालेक्सी एस१० को नयाँ मोडेल पनि सार्वजनिक गरेको छ। यो स्मार्टफोनमा पाँचौं पुस्ता (फाइभ–जी) को तारविहीन टेलिफोन नेटवर्कको प्रयोग गर्न सकिन्छ।
सामसुङका अन्य प्रतिस्पर्धीहरूले अर्को साता सुरू हुने मोबाइल वर्ल्ड कंग्रेसमा फाइभ–जी मोबाइल सार्वजनिक गर्ने अपेक्षा गरिएको छ। (रासस/एएफपी)
