बैंक तथा वित्तीय संस्था तथा पर्यटन क्षेत्रमा लगानी गरिरहेको प्रभु समूहले प्रभु डिजिटल टीभी प्रसारण सेवा सुरु गरेको छ। समूहले नेपालमै पहिलोपटक डिजिटल भिडियो प्रशारण (डीभीपी–टी २) सेवा सुरु गरेको हो।
आइतबार आयोजित औपचारिक कार्यक्रममा समूहका अध्यक्ष देवीप्रकाश भट्टचनले सेवाको सुरुवात गरेका हुन्।
पहिलो चरणमा काठमाडौं, पोखरा र चितवनबाट प्रभुले सेवा सुरु गरेको छ। इटहरी, धरान, विराटनगरलगायतका ठाउँमा ३ महिनाभित्रै सेवा सुरु हुने अध्यक्ष भट्टचनले जानकारी दिए।
दोस्रो पुस्ताको यो प्रविधि दक्षिण एसियामै पहिलो भएको उनको दाबी छ।
फ्रिक्वेन्सीमार्फत भिडियो, अडियो तथा अन्य डाटा प्रसार हुने यो प्रविधिमा सानो एन्टेना, सेटअपबक्स चाहिन्छ।
पहिलो चरणमा सबै स्थानीय च्यानलहरु निशुल्क हुने प्रभु टिभीले ६० वटा च्यानल उपलब्ध गराउने छ। अहिलेको लागि एकल प्रयोगकर्ताले ६ महिनाको सुल्कसहित १६ सय रुपैयाँ लाग्ने छ भने सेटअप बक्सको लागि १ हजार रुपैयाँ लाग्ने छ।
त्यस्तै संस्थागततर्फका ग्राहकको लागि सेटअप बक्सको लागि ८ सय रुपैयाँ र महिनाको २ सय रुपैयाँ तिर्नुपर्ने छ।
प्रभु टिभीले टिभी, मोबाइल, ल्यापटप, कम्प्युटर र ट्याबलेटबाट पनि हेर्न मिल्ने छ।
