अमेरिकाको म्यासाच्युएटस् इन्स्टिचुट अफ टेक्नोलोजी (एमआईटी) ले काठमाडौं विश्वविद्यालय र एनसेलसँगको सहकार्यमा नेपालमा एमआईटी ग्लोबल स्टार्टअप ल्याब्स् (जिएसएल) कार्यक्रमको सुरूवात गरेको छ।
नेपालका लागि श्रीलंकाली राजदुत स्वर्ण परेरा, अमेरीकन दुतावासकी कल्चरल अफेयर्स अफिसर ग्रेस क्यारोल, नेपाल दूरसञ्चार प्राधिकरणका वरिष्ठ निर्देशक आनन्दराज खनाल, काठमाडौं विश्वविद्यालयका रजिष्ट्रार प्रा. डा. भोला थापा, एमआइटीका इलेक्ट्रिकल इन्जिनियरिङ् र कम्प्यूटर साइन्स विभागका एशोसिएट विभाग प्रमुख तथा जिएसएलका फ्याकल्टी को—डाइरेक्टर प्रोफेसर समन अमरासिंघे र एनसेलका प्रबन्ध सञ्चालक सुरेन जे. अमरासेकराले शुक्रवार एक विशेष समारोहबीच कार्यक्रमको संयुक्त रूपमा उद्घाटन गरेका हुन्।
एमआईटी जिएसएल कार्यक्रम एनसेलको व्यवसायिक सामाजिक उत्तरदायित्व पहल अन्तरगत एमआइटी र काठमाडौं विश्वविद्यालयसँगको सहकार्यमा सुरू गरिएको हो।
विद्यार्थीहरूलाई उद्यमशीलताका ज्ञान प्रदान गर्नु र स्टार्टअपको विकासमा मदत गर्नु यो कार्यक्रमको लक्ष्य रहेको बताइएको छ।
कार्यक्रममा काठमाडौं विश्वविद्यालयका विद्यार्थी तथा विश्वविद्यालयका आल्मुनाइबाट छानिएका ३५ जना विद्यार्थीहरूले मोबाइल प्रविधि र उद्यमशीलता सम्बन्धी एमआइटीको अद्वित्तीय पाठ्यक्रम अन्तर्गत प्रशिक्षण प्राप्त गर्नेछन् ।
कार्यक्रम असार १ गतेदेखि साउन १७ सम्म सञ्चालन हुनेछ।
